Ayeri pela mañana, un puñáu de 40 persones xuntámonos pa visitar xuntos el castru Chao Samartín y el so muséu allugaos na población llamada Castro nel conceyu de Grandas de Salime.
La escoyeta de faer esta actividá nel castru Chao Samartín nun foi por casualidá. Como tol mundu sabe, esiste un proyectu d’edificación d’un centru de visitantes n’el mesmu xacimientu, que poles sos característiques, estrozaría lliteralmente dos xacimientos de gran importancia entá por escavar, unu de la Edá del Bronce y otru de la Edá del Fierro, la perda de los xacimientos en sí, lo mesmo que de los elementos arqueolóxicos que podríen atopase neses parceles ye d’un valor incalculable… para tol mundu esceutu pa unos pocos, que nun puen o nun quieren velo, sobro too el promotor d’esi disparate que ye la construcción d’esa edificación dientru’l perímetru’l castru ya ensín necesidá nenguna y desoyendo les opiniones desfavorables a tal propósitu feches por prácticamente la totalidá d’espertos/es asturianos/es nesta materia. Esu, ensin entrar nel incumplimientu de la Llei de Patrimoniu, ya qu’ésta axusta que toa aición dientro d’un xacimientu arqueolóxicu o dientro d’un área que presuntamente pueda ser d’interés arqueolóxicu, tien de cuntar con un arqueólogu que dictamine si ye procedente o non, realizar les obres nesi llugar y hasta onde. Bien, nel casu d’esti proyectu nun se fixo asina, namás cunta col proyectu de dos arquitectos, que nun tán cualificaos en forma dalguna para valorar los parámetros arqueolóxicos que tuvieren de ser teníos en cuenta. Tampoco se tien en cuenta la disconformidá mayoritaria nel Parlamentu Asturianu sobro esti asuntu cuando Esquierda Xunía d’Asturies llevolo p’alderique. En fín, toos estos detalles poder seguri na hemeroteca según n’otros artículos qu’espublicemos na Lliga Celta d’Asturies sobro esti espeluznante asuntu.
Tampoco foi casual la elección de la persona que diba encargase de realizar la conferencia de campu a lo llargo de la visita’l muséu ya’l castru Chao Samartín, de xacíu que non, propunximos a Angel B. Villa Valdés, que collaborara con nós y, como siempres, y dende el más absolutu altruísmu, aportó a collaborar con nós na función d’informar a tolos asistentes a la visita de les característiques del castru, la so población, periodu d’ocupación, descubrimientos arqueolóxicos, etc; esto ye, de tolos parámetros técnicos relativos a esti enclave tan especial, y agora amenaciáu, de la hestoria de Asturies. Y puede facelo porque Angel B. Villa Valdés, ye arqueólogu del Muséu Arqueolóxicu d’Asturies, foi Director del Parque Arqueolóxicu del Navia-Eo, y participó na direición de les escavaciones d’esti castru, por non falar de que ye autor de dellos trabayos y artículos sobro esti castru; ye dicir, yera la persona indicao pa ello.
Una vegada esplicáu los principales motivos d’esti eventu: informar de l’importancia del castru Chao Samartín, el peligru que cuerre, y fomentar la puesta’n valor del patrimoniu históricu cultural asturianu ente la mesma población asturiana… voi falavos de como foi l’actividá.
A esu de les 11:30 de la mañana llegaren yá prácticamente toles persones que díbemos esfrutar d’esta xornada d’hestoria, arqueoloxía y reivindicación, in situ, sobro’l llugar d’interés, el castru Chao Samartín. Dempués de les oportunes presentaciones, y sorpreses, yá que vinieron persones de relevancia, tantu dientro del conceyu de Grandas de Salime, como’l gran Pepe «El Ferreiru» o Susana Hevia, directora del Muséu Etnográficu de Grandas de Salime; comu persones venceyaes al periodismu; arqueólogos/as; un miembru fundador de la Lliga Celta d’Asturies allá pelos años 80, Xuan Naveiras; y delles persones comenenciudes nesta actividá ya’l so conteníu, ente elles cuatro persones de la vecina Galicia, lo cual paecionos escelente y prestonos enforma la so presenta ya’l so interés.
Yo fice la presentación del eventu, espliqué someramente qué ye la Lliga Celta d’Asturies, qu’oxetivos y valores tenemos, les actividaes y proyectos que desenvolvemos antes de dexar la palabra yá, pol restu del eventu, al nuesu collaborador Angel.
L’actividá, podemos dicir, que s’estremó en dos partes: la visita al muséu, y la visita al castru. Na visita al castru, Angel, tuvo falándonos de como empezó la escavación del mesmu, por quién, cómo se consiguió, que persones participaron d’aquel eventu, etc. Depués prosiguimos peles distintes partes del muséu ente qu’a midida que avanzávamos Angel diba esplicándonos cada unu de los aspeutos y oxetos del muséu aportandos una cantidá d’información, de la que nun se ve nes guíes o «letreritos del muséu» absolutamente impagable , anque lo más increíble de too ye que lo fai con una pasión que fai que l’interés de los asistentes fora n’aumentu ca vegada más y más, lo que fizo que xurdieren abondes entrugues que foi retrucando una a una aclariando les duldes y ampliando la conocencia de toos sobro esti magníficu castru y la so hestoria.
Una vegada acabamos la visita al muséu, diriximonos al xacimientu, ónde Angel pudo esplayase a gustu, notábase que taba realmente nel so elementu porque ellí, viéndo los fosos, les cabanes, los elementos constructivos, y les distribución de los mesmos, foi onde Angel pudo tresmitinos meyor les sos conocencies sobro’l castru y como meyor, a lo menos los legos na materia, pudimos entendelo con mayor claridá. Foi una xornada realmente clarificadora, didáctica, emotiva y, sobremanera lúdica… ¡Impagable!
A la fin de la visita’l castru, fuimos, como nun podía ser otra manera, a tomar un aperitivo al Albergue de Castro, ónde corrió la cerveza artesano y la sidre asturiano hasta que dalgunos de nos fuimos comer a Grandas de Salime, ónde pudimos tastiar la cocina llocal que permítome calificar de deliciosa… ya’n síntesis esta ye la crónica de l’eventu, ye imposible cuntavos per esti mediu tolo qu’aconteció, lo que viviose, lo que falose, y lo que sintiose… pa vivilo hai que tar ellí participando…
Dende la Lliga Celta d’Asturies queremos agradecer fondamente a toles persones qu’asistieron la so participación nel eventu, ensin ellos nueses actividaes nun tendríen sentíu; a Angel B. Villa Valdés la so inestimable y desinteresada collaboración, yes un grande Angel; y a los medios de comunicación: infoasturies, asturies,com y La Nueva España l’espardimientu d’esti eventu.
Espero sinceramente que’l sentíu común y la llegalidá vixente imperen nesti problema qu’anguaño esiste cola amenaza rial de l’esfarrapamientu de dos xacimientos de gran importancia del castru Chao Samartín entá por escavar, ya qu’enxamás, dende la Lliga Celta d’Asturies, tengamos qu’entamar actividaes al envís de denunciar coses asina.
Un saludu candial a toos/es,
Fernán Morán, presidente de la Lliga Celta d’Asturies.
Lliga Celta d'Asturies 