RESPUESTA DE LA LLIGA CELTA D’ASTURIES A LES DECLARACIONES DEL CONSEYERU D’EDUCACIÓN Y CULTURA SOBRO LES ACTUACIONES DEL CASTRU CHAO SAMARTIN A LA JGPA

Ayeri, vienres 23 de febreru, tuvimos la desagradable oportunidá de lleer nos medios de comunicación que’l Conseyeru d’Educación y Cultura, el señor Genaro Alonso, fixera unes declaraciones en plenu de la Xunta Xeneral del Principáu nes que, según lléese nos medios, desmentía que’l proxectáu Centru de Visitantes fora faese nel llugar ónde tán allugaos los xacimientos, yá denunciaos anteriormente por esta asociación, del Bronce final y l’Edá del Fierro.

Si tou esto ye ciertu, el señor Alonso tien de DIMITIR del so cargu a la mayor celeridad yá que, o desconoz dafechu de qué fala, o nun diz la verdá, en dambos casos, causa más que xustificada por qu’abandone darréu’l cargu qu’ocupa.

Nós nun dicimos esto por caprichu, según la información qu’obra nel nuesu poder relativa al proyectu, SÍ ta proxectáu allugar el Centru de Visitantes nel llugar del xacimientu y SÍ tiense proxectáu usar formigón para la realización de la obra, tal que puede vese nes fiches y semeyes qu’amosemos de siguío:

               

Dicho too esto… ¿Ú ta’l papel tuitivo que tien de tener el Gobiernu del Principáu d’Asturies pa col patrimoniu históricu-cultural de tolos asturianos? ¿Cómo ye posible que los técnicos de l’Alministración asturiana dieren de pasu’n proyectu asemeyáu qu’estrozaría dos xacimientos de vital importancia pa la conocencia la Hestoria d’Asturies?; Estes y otres esmolecedores entrugues son les que mos faemos agora mesmu na Lliga Celta d’Asturies porque nun podemos entender la falta d’interés absoluta que s’amuesa, yá en repitíes ocasiones, pol caltenimientu del patrimoniu cultural d’Asturies per parte de la entidá que mayor interés y predisposición tendría de tener nesti sentíu, percima inclusive qu’el de toles asociaciones y colectivos que denunciamos acciones como estes… pero paez que nun ye asina… ¿Por qué? Nun tenemos la respuesta.

Namá quédanos una cosa que dicir: nós, el pueblu asturianu, tenemos derechu a caltener el nuesu patrimoniu, el nuesu heriedu histórico y cultural, para nós y para les xeneraciones futures y ESIXIMOS al Gobiernu del Principáu d’Asturies que cumpla col so cometíu al respeutu y reconsidere tou esti despropósitu y tómense les midíes oportunes para evitar qu’Asturies y el so pueblu pierdan para siempres la oportunidá d’estudiar dos xacimientos arqueolóxicos de suma importancia para toos nós, para tola Humanidá.

Fernán Morán, presidente de la Lliga Celta d’Asturies.

Enllán d’interés p’afondar na conocencia l’importancia los xacimientos que tamos defendiendo: http://www.castrosdeasturias.es/descargas/224-villa-menendez–gil-2006.-fortificaciones-militares-chao-samartin.-congreso-arqueologia-militar-romana-en-hispania.pdf

 

Anuncios

DENUNCIAMOS LES ACTUACIONES PROYECTAES SOBRO’L CASTRU CHAO SAMARTÍN YA SOLICITAMOS LA SO SUSPENSIÓN.

Güei conocimos al traviés del Grupu Parlamentariu d’IX Asturies que lo que se prometía como una esperanzadora intervención n’unu de los nuesos xacimientos arqueolóxicos más singulares, el castru de Chao Samartín en Grandas de Salime, podría significar, en realidá, una fonda alteración del conxuntu, tantu de los restos escavaos como de superficies inda inédites pero con enorme potencial arqueolóxicu.

Tolos medios faen ecu de los defectos técnicos del documentu qu’agora se denuncia: nun s’atienen a les convenciones internacionales ya ignórense los valores que faen d’estes ruines un documentu escepcional para la conocencia de la hestoria d’Asturies.

L’ausencia nel espediente d’informes ellaboraos por espertos en técniques de restauración y caltenimientu arqueolóxicu, la falta de consultes a los investigadores especializaos que fueron responsables de la escavación ya interpretación histórica del xacimientu y l’aplicación de materiales y procedimientos irreversibles, incluyíu l’usu del formigón armáu, resines epoxídicas o la reconstrucción indiscriminada de muries, contravienen tolos encamientos y convenios internacionales qu’emponen les intervenciones en llugares arqueolóxicos. La calidá paisaxística del conxuntu y l’integridá de depósitos arqueolóxicos ricos y entá inexplorados van vese fatalmente comprometíes cola proxectada construcción, sobro la fachada principal del xacimientu y en terrén arqueolóxicamente fértil, d’un edificiu d’acoyida, llevantáu apenes a unos centenares de metros del centru d’interpretación yá esistente.

Pero hai un aspeutu apenes comentáu mientres la rueda de prensa que resulta especialmente esmolecedora. Y ye que, según súpose, cola execución d’estes obres pretende despintase, soterrar o destruyir les principales evidencies de la ocupación prehistórica del asentamientu: les ruines del primitivu asentamientu fortificáu de finales de la Edá del Bronce, escontra’l 800 a.C. (el más antiguu conocíu n’Asturies), van ser, asina consta lliteralmente nel proyectu, soterraes porque “el so interés nun ye bien eleváu”. La mesma suerte van correr los elementos defensivos que prueben la intensa y socesiva fortificación del castru mientres la Edá del Fierro (fosos y fases antigües de les muralles) que van ser tamién soterraes pa, dizse, evitar la degradación estructural.

A última hora, la execución de les intervenciones conteníes nos proyectos d’obres urxentes y d’afitamientu de les ruines del Chao Samartín implica’l ocultamiento, destrucción o falsificación d’elementos claves na interpretación del xacimientu, de la so hestoria y, poro, tamién de la Hestoria d’Asturies.

Ye paradóxicu que mientres se nos brinda al traviés de les xornaes del RIDEA alcordances de les bondaes qu’apurrió y apurre l’arqueoloxía, en concretu l’arqueoloxía castreña, a la sociedá nel so conxuntu, tantu l’asturiana nesti casu, como la d’otres poblaciones y rexones del noroeste de la península Ibérica, coles mesmes, somos testigos, una vegada más de la más bochornosa incompetencia y desinterés absolutu per parte del actual Gobiernu d’Asturies pol nuesu patrimoniu históricu-cultural.

¿Cómo puede xustificase que sabiendo qu’esisten xacimientos por escavar, dalgunos de la Edá del Bronce y otros de la Edá del Fierro autorice un tipu d’obra civil que lliteralmente estrozaría estos xacimientos ensin posibilidá de recuperación? Cenciellamente nun pue xustificase… nun tien igua.

Ye por esto que dende la Lliga Celta d’Asturies esiximos al Gobiernu de Asturies que ponga frenu a esta xirigonza y cumpla cola so obligación que, nesti casu, ye la de protexer, caltener y garantizar la pervivencia d’esti patrimoniu, que ye de tolos asturianos y dedique más recursos a la investigación de la hestoria y cultura asturianes y menos a la so desapaición, como sería nesti casu concretu. No hacer casu a esta petición sedría atentar escontra nuesu patrimoniu ensín xustificación nenguna.

¿Por qué dicimos too esto? Vamos intentar amuesar evidencies lo más gráficamente posible:

Semeyes 1, 2 y 3.  Gran plaza pavimentada del Chao Samartín. Malinterpretaes como esbarrumbes producíos tres l’escavación, les evidencies qu’amuesen la violencia del sismo que causó la ruina del pobláu van ser destruyíes para, en picando y rebaxar la base xeolóxica, construyir, sobro un encofráu de formigón armáu, un muriu de nueva factura contrachapáu con piedra caliar local” (sic).

  

 

 

 

Semeyes 4 y 5 .  Les trincheres qu’amuesen el vaciáu de los murios castreños en dómina de la Monarquía Asturiana, primer testimoniu d’usu medieval del Chao Samartín van ser utilizaes pa construyir murios de nueva factura que “faciliten la llectura” del xacimientu en dómina romana.

   

Semeyes 6 y 7. Tolos restos correspondientes a les fases más antigües del pobláu, munchos d’ellos escepcionales n’Asturies, van ser soterraos y escluyíos del discursu xeneral de la visita pos “el so interés nun ye bien eleváu” (sic). Ente otros l’edificiu más antiguu topáu na nuesa rexón (800 a.C.).

Semeyes 8 y 9. Pa facilitar l’accesu a los fosos, en que la so secuencia estratigráfica se documentan episodios escepcionales de la refortificación del castru pol exércitu romanu, van ser estensamente alteriaos pola construcción d’una rampla. El movimientu de tierra, bien cimera al que riquió dellos años d’escavación a un equipu especializáu, va ser  realizáu con medios mecánicos y controláu como cualquier obra de carretera con un meru “siguimientu arqueolóxicu”.

  

Semeyes 10 ya 11. Sobro estos mesmos elementos, les fortificaciones esteriores entá non escavaes, y ocupando un llugar clave pa la observación del xacimientu per parte del visitante dende’l Muséu y nel so aproximamientu a les ruines, va construyise un edificiu “d’acoyida”. La obra va implicar la destrucción d’horizontes arqueolóxicos fértiles, el cambéu de la so morfoloxía y la degradación definitiva de la principal vista del xacimientu.

             

En función de tola información contenida nesti artículu, dende la Lliga Celta d’Asturies, esiximos al Gobiernu d’Asturies que tome les midíes oportunes para parar esti despropósitu y actúe como debiera, esto ye, actuando de forma que les consecuencies de les sos acciones traigan la preservación y caltenimientu nes meyores condiciones posibles del nuesu patrimoniu y non a la inversa, una y bones esti proyectu” amás d’erróneu, na nuesa opinión, significaría estrozar dos xacimientos de suma importancia para conocer la hestoria d’Asturies, y amás de forma irrecupaerable.

De la mesma, hemos de dicir, bien al nuesu pesar, qu’esta mesma información s’unvio’l 8 de febreru del añu en cursu, vía correo ellectrónicu a dellos medios de comunicación: Asturnews, La Nueva España, Asturies.com, AsturiasHoy, El Comercio, La Voz de Asturias, RTPA, RTVE Informativos, Infoasturies, Oviedo Agencia EFE ya Asturies Europapress, ensín que nengún d’ellos lu espublizara ta la fecha. Suponemos que los sos motivos van tener, anque nun seyamos entendelos ya que pa nos, esto ye un posible atentáu escontra nuesu patrimoñu, el de tolos asturianos.

Fernán Morán, Presidente de la Lliga Celta d’Asturies, artículu ellaboráu cola información sobro’l proyeutu que proporcionó la Xunta Xeneral del Principáu d’Asturies.

CHARRA – COLOQUIU: LA TOPONIMIA CELTA D’ASTURIES.

Güei tuvimos el placer de contar col gran Xulio Concepción Suárez, un sabiu que lleva décades investigando y afondando na conocencia de l’identidá ya hestoria d’Asturies al traviés de los sos nomes, les sos pallabres.

Amuesonos el so diccionariu etimolóxicu, centrándonos nel campu de los raigones célticos asoleyaos n’estremaos campos d’estudiu: augüa, lluz, relieve, etc. Notose abondu los años de docencia, asina como la pasión polo que fae porque fizo d’una materia siempres complexa como ye la llingüística, daqué afayaízu y prestosu pa tol mundiu, al mesmu tiempu que nun dexaba d’enseñanos coses nueves.

Comu’l formatu yera de coloquiu, la xente al pocu, debío al bon ambiente qu’hebía na sala enseguida confiose, y foi apurriendo idegues, entrugues, conocencia personal, a Xulio yo creyo que-y presto, ya dió-y xueu pa retrucar toles entrugues que se-y plantegaron, aclaranos conceutos, ya enseñanos munchos otros.  Inclusu aldericamos sobre les falacies construyíes sobro la braera hestoriografía ya identidá d’Asturies y la necesidá d’apurrir más medios pa investigación porque Asturies ya’l pueblu asturianu merézlo.

En síntesis, foi una charra-coloquiu mui prestosa, na que aprucieron munches coses desconocíes pa muncha xente ya estableciéronse contautos con otres asociaciones comu la de Vendonius, de la qu’un miembru averose a la charra; xente del partíu políticu Andecha Astur; xente venceyao al mundiu de la llingüística, y persones interesaes pel tema.

Dende la Lliga Celta d’Asturies, agradecemos l’asistencia a tola xente que tuvu na charra; nuesu más fonderu agradecimientu a Xulio pol so saber, como tresmitiolo a toos, ya’l so enfotu desinteresau por Asturies; a los medios de comunicación qu’espardieron esti eventu (Infoasturies y Asturies.com); y como non, al Hotel d’Asociaciones Santuyanu por cedenos la sala con tol equipamientu necesariu pa facer esti eventu… GRACIES!

Fernán Morán, Presidente de la Lliga Celta d’Asturies.