CHARRA “EL RAMU ASTURIANU: UNA VISIÓN ETNOGRÁFICA.”

Ayeri tuvimos el gustu de sentir a Eva Tejedor, falanos del ramu asturianu, l’ufrenda’l ramu y les dances y cancios rellacionaos pa con él nel so conceyu d’orixe, Peñamellera Baxa.

Eva tuvo brillante, fíxonos un percorríu por distintes llocalidaes del conceyu Peñamellera Baxa ya nuna mistura de charra, esposición fotográfica y conciertu, foi averándonos al xeitu de cellebración del ramu en cá llocalidá lo que fizo del eventu daqué perinteresante, afayaízu y prestosu… de fechu hebe dalguna vegada que los cancios l.legaron a poneme los pelos comu escarpies!

Tamién pude constatar, poles indicaciones ya desplicaciones d’Eve Tejedor, qu’esiste un venceyu manifiestu ente l’ufrienda’l ramu a la Virxe y les ufriendes de nuesos ancestros a la Dios Madre. Yeren ritos de fertilidá, cristianizaos col pasu’l tiempu y qu’angüañu formen parti del folclor asturianu.

Nun mos queda más qu’agradecer a tola xente qu’averose a sentir la charra la so presencia, al personal del palaciu de Valdecarzana l’escelente tratu de so pa con nos, a la Ca’l Conceyu d’Avilés la cesión d’usu de la sala pa facer esti eventu, a mio compañera Alicia el so trabayu y enfotu y por supuestu a Eva Tejedor pola so collaboración y por compartir con toos/es nos el so saber y la maxa’l so canciu cola xente que tábemos ellí.

Fernán Morán, presidente de la Lliga Celta d’Asturies.

Anuncios

VISITA GUIADA’L CASTRU PICU CASTIELLU DE FOZANA.

El pasáu sábadu, 12 de mayu, una catarva de celtes axuntamos delantre de la puerta de la ilesia parroquial de Tiñana, nel conceyu de Siero, para empecipiar una pequena ascensión al castru Picu Castiellu de Fozana entamao pola Lliga Celta d’Asturies cola collaboración del doctor n’arqueoloxía Alfonso Fanjul Peraza, que tuvu escavando y faciendo sondeos n’esti castru nun proyeutu cofinanciau pola Universidá de Salamanca nel qu’atopose varios materiales: güesos d’animales, granes, cerámiques, etc.

El castru, d’una dimensión bastante grandi ya que tien alroidu de 120×60 metros, según les dataciones de carbono 14 feches na escavación que mentaba enantes, data del sieglu IV-III enantes de Cristu anque llegose atopar cerámica romana e inclusu altomedieval, polo que tantos sieglos d’ocupación-y confieren importancia por tola información que puede tener contenida nel so senu.

Esti castru yá foi reconocíu y catalogáu por J. M. González en 1957, y tamién protagonizó un estudiu monográficu realizáu por Alfonso Fanjul Peraza nel 1997. Anguaño tán a puntu de salir dellos artículos bien interesantes que van recoyer los últimos estudios realizaos nesti castru.

Como elementos más destacables d’esti castru, podría resaltar en primer llugar la so posición, a unos 400 metros d’altitú dende la que puede vese tola cuenca del Nora coles posibilidaes estratéxicu y defensivu que trai. Depués, ta claro, los trés fosos en forma de ferradura qu’arrodien el castru, realizaos manualmente, y d’una fondura que resulta realmente impresionante. Y a lo último, y non menos importante, la presencia de delles cueves nel castru, sobremanera pola que cuerre un regueru d’agua duce qu’abastecía’l castru del vital elementu.

Un aspeutu significativu foi, según cuntónos l’arqueólogu Fanjul Peraza, que mientres les escavaciones atopó un estratu de povises de gran estensión que daba a entender que, en dalgún momentu enantes de la l.legada de los romanos, el castru foi amburáu y esfarrapáu, lo que suxure qu’había guerres ente clanes polo que l’actividá humana nel valle del Nora en dómina prerromana debía de ser alta.

Tocantes a la visita, de primeres había apuntaes 10 persones, anque a la fin tábamos 5, supongo que’l tiempu inestable echó tras a más d’unu. A eso de les 11:15 coyimos la 4×4 de Carlos, y fuimos por una caleya hasta l’entamu d’una pista forestal pola qu’empezamos l’ascensión al castru.

   

 

Nun fai falta dicir que’l paisaxe ye rialmente fermosu, una estensión de viesca rialmente prestosa y mientres el paséu tuvimos el gustu d’oyer a un xabalín qu’esfocicaba na folla. Siguimos un bon trechu campu al traviés hasta llegar al visu’l picu onde ta’l castru, mientres el paséu por esi trechu atopamos con dos caballos blancos realmente guapos y mansos bien paecíos a los ponis celtes de Connemara. Pocu dempués llegamos al castru.

               

Una vegada nel castru, l’arqueólogu Fanjul Peraza, amosónos les dimensiones del perímetru del castru, los fosos, les cueves, etc y esplicónos les característiques del castru, el so datación, qu’atoparon nes zones de sondéu, etc. Foi realmente interesante y amenu. Tamién contestó a toles entrugues que se-y diben formulando. Dempués d’eso, y d’esfrutar de les increíbles vistes que se nos ufiertaben dende’l castru, empecipiamos el descensu ya que’l Nuberu venía por nos con ganes de moyanos a toos.

              

Una vegada de vuelta en Tiñana, la cosa acabó como nun podía ser d’otra manera… nel chigre con unes botielles de sidre!

Fernán Morán, presidente de la Lliga Celta d’Asturies.

Bibliografía:

Fanjul Peraza, Alfonso; “Los castros de Asturias. Una revisión territorial y funcional”; Ed. Ayuntamientu Teberga, 2004; ISBN; 84-609-5319-X

Semeyes:

1ª.- Muestras recoyíes nel sondeu realizau por Alfonso Fanjul Peraza nel castru Picu Castiellu de Fozana nes que puede apreciase restos de güesos animales na de manzorga y arcilla na de la drecha. Autor: Anselmo Coto Argüelles.

2ª: Vista aérea de castro Picu Castiellu de Fozana, asitiáu en Fozana, parroquia de Tiñana, conceyu de Siero – Asturies. Autor: Alfonso Fanjul Peraza.

3ª.- Vista parcial de los fosos defensivos del castru. Autor: Carlos Suárez Lozano.

4.- Posando embaxu’l texu na ilesia parroquial de Tiñana. Autor: Carlos Suárez Lozano.

5.- Pola pista forestal y saltando pieslles. Autor: Carlos Suárez Lozano.

6.- Campu traviés, nel últimu tramu d’ascensión ya’l más pindiu!. Autor: Anselmo Coto Argüelles.

7.- Ya nel castru sintiendo les desplicaciones de Fanjul Peraza y posando enrriba una cueva de les del castru. Autores: Anselmo Coto Argüelles la de manzorga y Carlos Suárez Lozano la de drecha.