Como ye vezu tolos años, güei pudimos aconceyar un garrapieyu celtas p’acoyer la presentación, otru añu más, del cartafueyu de la Lliga Celta d’Asturies, ASTOR.
Portada del númberu 20 del cartafueyu de la Lliga Celta d’Asturies
Esti añu, cunta con los siete artículos que suel cuntar que vos vamos llistar de siguío:
– «Histories de Valentones», escritu pol investigador y miembru de la Fundación Belenos, Gauson Fernande.
– «Símbolos proteutores», escritu pola investigadora y semeyera de la Lliga Celta d’Asturies, Carmen Morán.
– «El megalitismu del centro-occidente asturianu nel contestu atlánticu: el casu particular del conceyu Salas y el proyectu La Cobertoria», escritu por Fernando R. del Cueto, Prof. Ayudante Doctor, Departamentu d’Historia. Área de Prehistoria, Universidá d’Uviéu, Asturies; Miguel Carrero Pazos, investigador nel Institututu d’Arqueoloxía Marie Curie Research Fellow de la Universidá de Londres, Reinu Xuníu y Miguel Busto Zapico, investigador postdoctoral nel Juan de la Cierva-Formación, Universidad de Granada, España.
– «Llucha celta asturiana»: Valtu, escritu por Enol Fuente Corripio, coordinador del proyeutu de la Lliga Celta d’Asturies de recuperación de la llucha celta Valtu n’Asturies.
– «La sidre asturiana», una nota d’economía histórica, por David M. Rivas, profesor titular d’Economía Aplicada de l’Universidá Autónoma de Madrid.
– «La conquista d’Asturia por Roma», escritu pol doctor n’arqueoloxía Jorge Camino Mayor.
Cuntamos con dos de los collaboradores na revista, David M. Rivas y Carmen Morán, que nos falaron de sos respeutivos artículos y Fernán Morán, Director del cartafueyu ASTOR, que fizo los comentarios venceyaos al restu d’artículos que contien el cartafueyu.
D’esquierda a drecha: Fernán Morán, Director del cartafueyu ASTOR y David M. Rivas, profesor titular de la Universidá Autónoma de Madrid mientres la presentación del númberu 20 d’ASTOR.
A la fin, esfrutamos de los conteníos y sobro too de la compañía yá qu’ente la xente que s’averó a la presentación cuntamos con bonos collacios como Ángel B. Villa Valdés -doctor n’arqueoloxía del Museu Arqueolóxicu d’Asturies-, o Xosé Alba -profesor titular de la Universidá d’Uviéu-, que participaron activamente na presentación y formularon delles entrugues y comentarios bien interesantes y prestosos.
Dempués de la presentación del cartafueyu ASTOR númberu 20 nel «Conceyu d’Escoyíos», aldericando de «lo nueso» acompañaos de zusmiu cebada.
Como suel ser nesti tipu d’eventos, finamos l’eventu, nun chigre «los escoyíos», falando de delles coses «de lo nueso» mientres refrescábemos una migayina’l gargüelu con zusmiu cebada… ¡Tal prósimu númberu!
Esti pasáu sábadu 26 de febreru, un garapiellu celtes aconceyamos na sede la Lliga Celta d’Asturies pa sentir les desplicaciones del Dr. en Filoloxía Xuan Xosé Lajo respeutu a les sos motivaciones pa facer esti diccionariu, dellos aspeutos interesantes sobre la llingua celta irlandesa, datos interesantes sobre la llingua celta de los astures y delles coses que xurdieran mientres desendolcávase la conferencia.
Nun vos voi comentar nada sobre’l conteníu por que vais poder velo por vosotros mesmos, por primer vegada grabamos una actividá de la Lliga Celta en vídeu, como ye la primer vegada, quiciabes los vídeos nun tienen tola calidá que debiera -sobre tou en soníu-, diremos corrixendo dellos erros col tiempu y vueses indicaciones.
De siguío vamos colingar equí los enllaces de los vídeos, son tres, nos que vais poder ver la conferencia entera, esperamos que vos paezca tan interesante como foi pa nós.
Parte 1:
Parte 2:
Parte 3:
Con esto yá ta a la vueso disposición la interesante conferencia que les persones qu’asistimos pudimos esfrutar en vivu y en diréutu, pa los que nun pudístis acercavos teneis la oportunidá de poder sentila en diferíu, esfrutaila!
Nuesu mayor agradecimientu a Xuan Xosé Lajo por ufrecenos el so saber con un exerciciu comunicativu perafayaízu pa toos y la so bayura como persona; como nun puede ser d’otru mou, tamién queremos amosar nuesu fonderu agradecimientu a toles persones que vos aconceyásteis con nós pa sentir tolo que tenía que decinos sobre llingüística esti sabiu astur, Xuan Xosé Lajo, y lo qu’apurrieron na sala los tamién no menos sabios qu’aportaron a la conferencia.
Salú a toos y toes,
Fernán Morán Suari, presidente de la Lliga Celta d’Asturies.
Entrevista a Tania Morillo, artesana y xerente del taller artesanu Indumentaria Tradicional l’Alborada, fecha por Enol Fuente Corripio, miembru de la Lliga Celta d’Asturies.
Col pruyimientu de les cortes europes surdieron modes de vestimenta qu´aina espardiéronse pel continente europeu. Darréu les clases populares adoptaron esos traxes na midía de les sos posibilidaes faciendo lo que conocemos como traxes tradicionales. N´asturies el procesu foi´l mesmu, el traxe´l país que llevamos anguaño yera´l que se vistía nel sieglu XVIII y primera meta del sieglu XIX y anque na zona rural se caltuvo más tiempo, foi desaniciando de magar la revolución industrial pola industrialización de texíos más baratos, tipos de trabayos como la minería y les migraciones.
¿Tipos de traxe según los llugares?
Sedría un erru falar de distintos traxes dientro del ámbitu territorial d’Asturies. Lo que sí podríemos dicir ye que según na fastera na que nos movamos, podríemos atopar influencies, pola cercanía de la indumentaria d’otros territorios. Un exemplu nidio d’esto sedría l’usu del rodáu o’l sombreru, nes zones que llenden con Lleón (L.lena, Ayer, Canguas del Narcea, Somiedu…) o l’estrechamientu del vuelu del dengue: nel occidente munchu más ampliu, como podemos atopar en Galicia y nel oriente, ensin apenes vuelu y siempres asitiáu debaxu d’un chaquetu que nun llega a abrochase, más asemeyau al cántabru.
¿Qué tipu de función cultural o folklórica desendolca?
De xuru, la indumentaria tradicional danos munchos datos de cómo vivíen n’Asturies en sieglos pasaos. Al traviés de los texíos, los colores y los usos que se-y daba a cada prenda podemos conocer l´estatus económicu y social de los sos portadores. Poro, creo que ye una xera pendiente y bien importante, que per aciu de les instituciones desplicar a la sociedá cómo yera la indumentaria asturiana real y faer escaecer yá’l traxe impuestu pola Seición Femenina que pa munchos ye consideráu’l ‘auténticu’.
¿Qué ferramientes de cordura utilices?
La única diferencia que puedo tener nel mio trabayu respecto al d’una modista del sieglu XVIII, ye que la máquina de coser que remano tien un motor elléctricu. Otra manera, puedo dicir que siguimos emplegando los mesmos materiales y preseos: aguyes, filo, alferga, xabón de xastre y tisories.
¿Qué materiales y teles emplegues?
Los texíos principales son dos: La llana, cola que se faíen los texíos de pañu, estameña, sayal, sayalín, pañete, bayetes… y tamién pala fabricación de lligues, medies, corexes o faxes. El llinu, col que se faíen llenzos para la confección de camises y calzonciellos, espaldares de xilecos, forros de les prendes, medies, mandiles o solitaries. Amás, había otros texíos que tamién s’emplegaben como yera’l terciopelu, los brocados o damascos y l’algodón. Estos texíos nun podíen ser utilizaos por toles persones, pos nun podíen ser iguaos nun telar propiu y teníen que ser mercaos nos mercaos. Tamién ye identificativu los colores na indumentaria: los coloraos intensos, azules y prietos nun yeren posibles de facer con tintes naturales. Los tintes qu’apurríen estos colores, teníen de ser importaos de les colonies españoles y, por ello, yera un productu bastante costosu que nun toles persones podíen dexase. Por tanto, cuando vistimos cola indumentaria tradicional, tenemos de tener en cuenta’l factor de los materiales y colores emplegaos nes nueses prendes para vistir acorde a lo que queremos amosar y nun cayer nel erru común d’entrepolar prendes bien austeres con prendes propies de persones de más estatus económicu.
¿Qué variedaes d´ornamentaciones hai?
Tenemos de tener presente que la indumentaria que güei ponemos yera la qu’usaben les clases obreres y por tanto, ropes que llevaben a diariu pal trabayu. Suel faese una diferenciación ente ‘traxe de probe’ y ‘traxe de ricu’, pero tenemos que tener en cuenta qu’esa persona rica a la que se fai referencia, nun yera una persona con gran poder adquisitivu, nin sería una persona que perteneciera a l’aristocracia. Poro, siempres falaríamos de clases trabayadores. Dientro d’estos parámetros, había persones que solamente podíen tener un traxe tola so vida adulta y persones que sí se podíen dexar camudar dalguna prenda a lo llargo de los años o tener dalguna prenda especial pa los díes más importantes del añu como les folixes y romeríes. Los adornos más habituales que se faíen nes prendes yeren, nel casu de la muyer, l’usu de terciopelu nos dengues, xugones, xilecos, mandiles y sayes o bordaos en refaxos, mandiles y pañuelos. Nel casu del home, podía utilizase el terciopelu pales monteres, xilecos, calzones y chaquetes.
¿Y los métodos de cordura?
Los métodos de cordura siguen siendo los mesmos. A pesar de la evolución na modistería, a pequeña escala, nun taller artesanu como L’alborada equi nel conceyu de Mieres del camín, to sigue siendo igual, tantu’l patronaxe como la confección que se fae igual qu’antaño.
¿Cómo ye l’oficiu?
La enseñanza del oficiu de confección de la indumentaria tradicional n’Asturies, nun s’imparte nenyures, por tanto, tien de ser la mesma persona interesao n’exercer esta actividá quien s’informe, forme y estudie toles carauterístiques y técniques propies, pela so cuenta.
A nivel institucional, la única reconocencia esistente a día de güei d’esti oficiu ye al traviés d’Artesanía d’Asturies, que ye un muerganismu dependiente de la Conseyería de Comerciu del Principáu d’Asturies, nel que se m’inclúi nel epígrafe de ‘productora de traxes rexonales’. Nel mio casu particular, soi autodidacta tocantes a la cosdura y deprendí a patronar na Escuela Dácala, en Mieres del Camín.
¿Qué tipos de veceros tienes?
Nun podría sacar un tipu específicu de la vecería porque ye abondo estremau. Dende persones que tán en dalgún grupu de baille, bandes de gaites, pasando por persones totalmente ayenes al folclor que quieren tener el so propiu traxe o persones integrantes de Centros Asturianos, especialmente d’Europa y d’América del Sur.
Salú pa toos y toes, tamos finando esti añu que como bien sabéis tuvu embaxu’l «xugu» del COVID19, lo que nun fizo mui afayaízu desendolcar actividaes presenciales como les que facemos de vezu nesta organización, sicasí, pese a toles torgues qu’hubo, pudimos facer delles actividaes que vos amuesamos de siguío:
a) Ellaboración del cartafueyu de la Lliga Celta d’Asturies ASTOR: esti añu, como vien siendo dende fai 2 años siguimos ellaborando esti interesante cartafueyu añal, dixital y gratuitu que vos podéis descargar dende esta misma páxina. Tamos entovía trabayando n’ello y esperamos poder presentavos el númberu 20 d’ASTOR a lo llargu del primer trimestre del 2022… tai sollertes!!!
b) Como yá sabéis, la Lliga Celta d’Asturies tien un proyectu de recuperación de la llucha celta asturiana «Valtu» nel que llevamos trabayando un par d’años. Fai unos meses, contautó con nós la Federación Asturiana de Llucha pa comunicanos so proyeutu de recuperación del valtu y la posibilidá de facer collaboraciones, iniciativa que sofitamos y agradecemos.
Lluchaores del equipu de Valtu de la Lliga Celta d’Asturies nel castru Nóega (Xixón)
c) Tuvimos el preste de participar una delegación de la Lliga Celta d’Asturies na manifestación pola oficialidá de les dos llingües amenorgáes d’Asturies, l’asturianu y l’eonaviego, que convocó la Xunta Pola Defensa de la Llingua Asturiana. Como tamién sabréis, la Lliga Celta d’Asturies sofita cualesquier iniciativa nesi sen y ye favoratible a la oficialidá del asturianu y del eonaviego, de fechu, son llingües vehiculares nes nueso publicaciones.
Miembros de la Lliga Celta d’Asturies na manifestación pola oficialidá n’Uviéu.
d) Entamamos una visita guiada a los castros de Mohías nel conceyu de Cuaña y Cabo Blanco nel conceyu d’El Franco pol doctor n’arqueoloxía y arqueólogu del Museu Arqueolóxicu d’Asturies, Ángel B. Villa Valdés. Axuntámonos alrodiu de mediu centenar de persones, aprendimos delles coses, esfrutamos y deprendimos de les esplicaciones d’Ángel, gozamos del paisax y, como non, pente visita y visita xintamos cómo xabariles n’A Caridá au nos pusimos bien de pote asturianu y sollombu gochu con salsa quesu, pa finar con una bona llambiotá… pa cayese gustu!
Semeya nel castru de Mohías (Cuaña) mientres la visita qu’entamamos guiada por Ánxel Villa
e) Celebramos la Xinta Añal de la Lliga Celta d’Asturies, eventu nel qu’invitamos a una persona u organización y faemos-y un pequenu homenax. Esti añu ficímosla nel restaurante Abrelatas de La Pola (Siero) y pasámoslo como «los indios» a la par qu’homenaxeamos al homenaxáu escoyíu esti añu: el doctor n’arqueoloxía Ángel B. Villa Valdés, pola so llabor como arqueólogu n’Asturies.
Dempués de la Xinta Añal de la Lliga Celta d’Asturies nel Abrelatas de La Pola (Siero)
f) Por últimu, poro nun menos importante, ficimos el Conceyu Añal de la Lliga Celta d’Asturies esti llunes pasáu que ye l’eventu nel qu’aldericamos y decidimos que vamos facer pal añu prósimu y escoyemos a la Xunta Direutiva si ye’l momentu facelo. Nós ya tenemos apuntao la xera a facer pa tol 2022…. y contentos/es de tenela!!!
Bono xente, esta ye la xíntesis de les actividaes de la Lliga Celta d’Asturies a lo llargu d’esti añu, esperamos que pal 2022 nun tengamos tantes torques col andanciu del COVID y podamos desendolcar tolo que tenemos programáu.
Curiavos munchu y que tou vos vaya bien!!!!
Fernán Morán Suari, presidente de la Lliga Celta d’Asturies.
Güei sábadu 27 de payares cellebramos la xinta añal de la Lliga Celta d’Asturies, eventu que facemos tolos años nel qu’aprovechamos pa venos, charrar, esfrutar de la gastronomía asturiana y fae-y un homenax a un/a asturianu/a que, por mor del desendolcu de la so llabor y so apurrimientu a la cultura e identidá asturianes consideramos que merez nuesu agradecimientu o reconocimientu.
Entrega del diploma d’agradecimientu pola so llabor al arqueólogo Ángel Villa Valdés por Fernán Morán, presidente de la Lliga Celta d’Asturies.
Esti añu decidimos homenaxar al arqueólogu Ángel B. Villa Valdés, angüañu arqueólogu del Museu Arqueolóxicu d’Asturies y miembru numberariu del RIDEA ya n’otru tiempu Direutor del Parque Arqueolóxicu Navia-Eo amás de participar dirixendo delles escavaciones de dellos castros d’esa fastera y pola so producción bien granible de conocimientu asoleyáu en non pocos trabayos arqueolóxicos, collaboraciones, llibros, charres, conferencies, etc. Fizo y fae una llabor impagable pa poder entender el pasáu de parte d’esta nación celta y comprender asina meyor nuesu presente.
Comensales de la xinta añal de la Lliga Celta d’Asturies.Comensales de la xinta añal de la Lliga Celta d’Asturies.
Esti añu la xinta fixímosla nel restaurante Abrelatas, de La Pola, nel conceyu de Siero, un sitiu bien prestosu nel que tar cómodu/a mientres que te «pones moráu» de bonos platos nos que s’amesta un pco de cocina de vanguardia fecha con productos asturianos 100% (nuggets de pitu caleya o bombones de gochu asturcelta -ye pa probalo de verdá, tan de muerte-) y de la mesma otros platos tradicionales asturianos como ye’l pote asturianu -sobren les pallabres pa describilo-. Too ello bien regáu con vino Los Escolinos de Cangas. Una fartura asturiana como tien que ser, dende l’entamu ta la fin. Vos encamentamos dir per ellí a conocelo porque paga la pena, producto asturianu, bona cocina, bon serviciu y un llocal mui afayaizu au tar cómodu/a xintando bien.
Semeya de grupu cola cocinera del restaurante Abrelatas de La Pola (Siero) incluyía.
Lo faláu, fartamos, falamos, canciamos, chumamos y retratámonos faciéndolo… Nun tábemos tolos que somos, faltonos nuesu querido compañero Sergio que ta pa la querida Éire, Enol que taba trabayando, Gayol que ta coles presentaciones del so últimu llibru… pero tabais con nós n’espíritu… ta l’añu próximu!
Fernán Morán, presidente de la Lliga Celta d’Asturies.
Dende fai dellos años, trabayamos apurriendo nuesu granín de sable nel procesu de recuperación de la llucha celta asturiana, el valtu.
Dempués d’un tiempu prudencial pa que los llectores del cartafueyu que vamos referenciar lleeran esti artículu de nuesu compañeru y coordinador del Proyeutu de Recuperación del Valtu de la Lliga Celta d’Asturies que s’asoleyó nel cartafueyu CONTRACORRIENTE, númberu 49 n’ochobre de 2019.
Ayeri sábadu tuvimos el preste de realizar l’actividá que teníamos programada de visitar los castros de Mouguías y Cabo Blanco guiaes pol doctor n’arqueología Ángel B. Villa Valdés.
A eso de les 11:30 de la mañana empezaron a llegar los primeros participantes, llegamos a xuntar daqué más de 40 persones con ganes d’esfrutar del paisaxe, de l’actividá y del conocimientu que pudimos deprender de mano de les esplicaciones del nuesu collaborador Ángel Villa.
Dempués d’unos minutos d’espera hasta qu’aportaron tolos/es participantes y dempués d’una curtia esplicación sobro que ye la Lliga Celta d’Asturies y les sos actividaes realizada por Fernán Morán, presidente de la organización, asina como de l’actividá que díbamos realizar, empezó la visita presentando a nuesu collaborador y guía de les visites a Ángel B. Villa Valdés, cendiéndo-y yá la palabra.
Ángel B. Villa Valdés púnxonos rápido en contestu y metiónos de llenu na xera cola so avezada y maxistral capacidá de comunicación de tou el so saber, faciendo qu’hasta la esplicación más técnica fora afayaíza y sobremanera interesante y motivadora para toles persones que tábemos participando de la sesión.
Nun fuimos directamente a la parte escavada del xacimientu, nos guió al traviés de maizales y cotoyes a lo llargo del perímetru del castru ónde pudimos ver detayes del fosu defensivu, cachos de la muria defensiva del castru y otros detalles bien interesantes. Ye realmente ablucante les coses que delles vegaes dexamos pasar cuando vamos solos/es y nun nos decatamos d’esos detayinos que faen que l’esperiencia de visitar el xacimientu seya rialmente especial.
Dempués d’esplicanos tolo visto y otres munches cuestiones que surdieron poles entrugues de los participantes, siguimos escontra la parte más escavada y ellí volvimos recibir otra clase maxistral d’arqueoloxía, hestoria y antropoloxía nun marcu más qu’aparente para ello.
Una vegada rematada la esposición d’Ángel Villa y dempués de contestar a una bon númberu d’entrugues derivaes del interés qu’aprució ente tolos/es participantes, rematamos la primer parte de l’actividá y colamos a la población d’A Caridá, nel conceyu d’El Franco pa xintar en xuntanza… non ensín facer enantes la semeya de grupu!
Escontra les dos y media la tarde realcontramos nel restorán El pozu de Güelita, n’A Caridá, tomamos un vermú y depués sentámonos nun comedor que nos acondicionaron para alluganos a tolos/es que díbamos -que nun yéramos pocos- ónde esfrutamos d’un escelente pote asturianu, un perricu y xugosu sollombu de gochu con pataques y un suculentu pastel de mazana. Y n’esa «perabegosa» xera tuvimos casi ta les cinco la tarde, intre nel que colamos para’l castru de Cabo Blanco con una bona fartura y mui bones sensaciones.
Llegamos al castru de Cabo Blanco dempués d’un curtiu paséu per campos de maíz hasta qu’aportamos al xacimientu. Yá a la entrada nun podemos evitar quedar impresionaos/es pola impresionante fondura del fosu defensivu del castru pol que nos metimos hasta llegar a un cantil que daba diréctamente al mar Celta. A lo llargo d’esti percorríu pudimos aprecirar -poles indicaciónes d’Ángel Villa-, les marques de los elementos de trabayu manuales colos que realizaron el fosu los habitantes del castru fai más de 2000 años… déxanos ensin palabres.
Depués siguimos el senderu que percuerre’l castru y que va llévanos lliteralmente hasta’l final del cabu. Esti castru nun ta escaváu, pero gracies a les esplicaciones d’Ángel Villa pudimos conocer toles partes del castru, l’allugamientu de les cabanes, del antecastro… a última hora, apurriónos una visión global del castru y de delles de les actividaes económiques que se desenvolvíen nel mesmu. Tou esto arrodiaos por un paisaxe que ye difícil tresmitir con pallabres.
Y a la fin acabamos la visita, despedímonos toos y toes emplazándonos pa la silguiente.
Fernán Morán, presidente de la Lliga Celta d’Asturies.
ALVERTENCIA: les fotografíes tienen propiedad intelectual d’autor/a, namá tien permisu para usales la Lliga Celta d’Asturies polo que queda prohibíu usar cualesquier de les semeyes ensin referenciar la fonte.
Dende la Lliga Celta d’Asturies, tenemos el preste de comunicavos les persones que tienen plaza acutada por rigurosu orde d’ínscripción:
09.421.872- Z + 1 pax (van a la xinta)
09.394.755- Z + 3 pax (nun van a la xinta)
09.351.939- R (va a la xinta)
X-7.157.141-R + 1 pax (van a la xinta)
71.594.297- N + 1 pax (van a la xinta)
09.429.030- L (va a la xinta)
11.420.111- J (va a la xinta)
71.651.216 -Y + 1 pax (nun van a la xinta)
10.358.995- V +1 pax (nun van a la xinta)
11.378.085- P + 2 pax (van a la xinta)
10.581.944- N (va a la xinta)
45.432.721- Q (va a la xinta)
45.431.810- W (nun va a la xinta)
76.941.612- B (nun va la xinta)
53.524.652- G (nun va a la xinta)
76.941.771- D (nun va a la xinta)
11.396.301- P +3 (van a la xinta)
11.867.865- C (nun va a la xinta)
51.702.916- C (va a la xinta)
11.377.000- G (va a la xinta)
11.427.909- Z (va a la xinta)
42.865.063- D (va a la xinta)
10.588.960- J (va a la xinta)
32.883.630- R (va a la xinta)
24.308.287- R +1 (van a la xinta)
53.519.794- J +3 (nun van a la xinta)
PROGRAMA:
11:30h-12:00h.- Recepción de participantes na entrada’l castru de Mohías y desplicación de l’actividá.
12:00h-14:00h.- Visita guiada pol doctor n’arqueoloxía Ángel Villa Valdés al castru.
14:30h-16:30h.- Xinta nel chigre «El pozo de güelita» na cali Pelayo, 9 de A Caridá. Menú compuestu de: pote asturianu, solomillo gochu con patates y arroz con lleche o requesón con miel (15:00€/menú). Esto ye opcional y vamos los/les que tamos apuntaos/es a la xinta.
17:00h-18:30.- Visita guiada pol doctor n’arqueoloxía Ángel Villa Valdés al castru.
18:30h.- Fin de l’actividá.
ENCAMIENTOS:
Ye una actividá al aire llibre polo que l’usu del mázcaru nun ye obligatoriu anque sí s’encamienta, sicasí, hai que caltener una distancia social de seguridá ente persones non convivientes de 1,5m siempres que seya posible.
Ye una actividá de campu polo que s’encamienta llevar calzáu (botes de montaña, zapatielles deportives…) y ropa (cómoda y cortavientu o chubasqueru) adecuaos pa l’actividá..
NOTES:
Les persones apuntaes a la xinta podrán desapuntase en cualesquier momentu ata les 00:01h del 20 d’ochobre, momentu nel qu’anque nun asistan al eventu tendrán qu’abonar el preciu’l cubiertu que vayamos reservar pal eventu si tuviéramos que facer el pagu del mesmu.
L’actividá entamada pola Lliga Celta d’Asturies ye de baldre, ye dicir, les dos visites guiaes.
Les persones que participen de l’actividá lo faen llíbremente y sedrán responsables de sí mesmes en casu de lesiones derivaes del desendolcu de l’actividá asina como los/es menores a cargu que lleven a l’actividá, la Lliga Celta d’Asturies queda exenta de cualesquier responsabilidá derivada del desendolcu d’esta actividá.
Milenta gracies a toos y toes pol vuesu interés, vémonos ellí y esfrutaremos y deprenderemos munchu en xuntanza, salú!
Fernán Morán, presidente de la Lliga Celta d’Asturies.
Dempués d’un añu y mediu ensin faer actividaes presenciales, ye pa nós un verdaderu preste ufiertavos esta actividá.
Se trata d’una visita guiada pol doctor n’arqueoloxía Ángel B. Villa Valdés, antiguu director del Parque Arqueolóxicu Navia-Eo y angüaño arqueólogu del Muséu Arqueolóxicu d’Asturies a los castros de Mouguías nel conceyu de Cuaña y el castru de Cabo Blanco nel conceyu d’El Franco. Mientres la visita a cada castru d’aprosimao 2 hores de duración, l’espertu internacional Ángel Villa va esplicanos d’un mou cenciellu, didáuticu y motivador los secretos d’esos xacimientos, lo que va ayudanos a deprender sobro esta parte de la nuesa hestoria tan importante pa saber quienes somos y va enseñanos a valorar y esfrutar del nuesu patrimoniu históricu-cultural.
Semeya del castro de Mouguías, conceyu de Cuaña. Fonte: Turismo de Asturias.
Amás del valor históricu-cultural de los xacimientos que vamos visitar, nun podemos dexar de llau’l valor paisaxísticu y natural de la redolada de dambos, que de xuru vos va cautivar y vos va ayudar a metevos más nel papel de los nuesos ancestros y entender meyor que tipu y cantidá de recursos naturales yera de los que disponíen.
Castro de Cabo Blanco, conceyu d’El Franco. Fonte: Turismo de Asturias.
D’últimes comentavos qu’una visita cultural ensin tener en cuenta la gastronomía local… queda un pocu coxa ¿non?, por eso ufiertamos la posibilidá de comer toos y toes xuntos/es esfrutando de la gastronomía escepcional de l’Asturies occidental n’unu de los múltiples restoranes de la zona, en principiu n’El Pozu de Güelita un menú del día, lo qu’amás d’arredondiar la esperiencia va ufiertanos la posibilidá de socializar y compartir idees y opiniones sobro la tema d’esta actividá y otros que puedan surdir.
Restaurante El pozo de güelita, allugáu na cai Pelayo, 6 de A Caridá, conceyu d’El Franco, Asturies.
De siguío dexámosvos equí’l programa de l’actividá por que podáis faevos una idea de la mesma:
11:30h.- Recibimientu y bienvenida a los/es participantes a la entrada del castru de Mouguías. Esplicación de l’actividá a cargu de Fernán Morán, presidente de la Lliga Celta d’Asturies.
12:00h: Realización de la visita al castru de Mouguías guiada pol espertu internacional n’arqueoloxía Ángel B. Villa Valdés.
14:30h.- Xinta del menú del día nel restaurante El pozo de güelita (opcional).
16:30h.- Realización de la visita al castru de Cabo Blanco guiada pol espertu internacional n’arqueoloxía Ángel B. Villa Valdés.
18:30h.- Fin de l’actividá.
Observaciones:
Para la visita hai 30 places les cuales van ser asignaes por rigorosu orde d’inscripción.
Para inscribise namá hai qu’unviar un corréu electrónicu a: lligaceltadasturies@gmail.com, indicando nome y apellíos de les persones que van dir y el so DNI (esta información va ser esaniciada de los ficheros de la Lliga Celta d’Asturies 15 díes dempués de la realización de l’actividá).
La llista de participantes va ser publicada (namá del DNI de un de los del grupu acompangáu del númberu persones que van con esa persona, por exemplu: 09.999.999Q + 2pax), 72h enantes de l’actividá nel nuesu blogue, na nuesa páxina de Facebook, na nuesa cuenta de Instagram y en la nuesa cuenta de Twitter.
La opción de comer el menú de día ye opcional, si nun s’apunta esprésamente la xente, entiéndese que les persones nun van dir a comer; si s’apunten a la xinta, eso xenera la obligatoriedá de pagu del preciu del menú sacantes que comuniquen 72h antes el so deséu de nun dir a la comida lo que -yos exhoneraría del pagu del cubiertu, si nun comuniquen que nun van dir a tiempu (72h anantias), tendrán qu’abonalu porque tenemos que reservalo. Publicaremos los platos del menú completu namá nos lu pasen (sele qu’hai pa tolos gustos).
L’actividá ye dafechu gratuíta, namá hai d’abonar el preciu del menú del día aquelles persones que lu esfruten.
L’actividá ye de campu, les places son llimitaes, encamiéntase (nun ye obligatoriu) l’usu del mázcaru mientres l’actividá y caltener la distancia de seguridá, ye pola seguridá de toos.
Encamiéntase llevar calzáu y ropa afechu yá que puede haber barro, piedres, charcos, pudiera orbayar, vientu… L’actividá ye apta pa tolos públicos (salvo patoloxía o condición qu’incapacite pa esti tipu d’actividá), nun se van realizar esfuerzos intensos.
Solo quédame dicivos que tamos encantaos/es de poder volver realizar actividaes presenciales, qu’esperamos aprender munches coses del espertu Ángel Villa Valdés coles mesmes qu’esfrutamos de los xacimientos, el paisaxe, la gastronomía, el restu participantes… ¡Qué ganes! ¡Estais convidaos/es! ¡Vémonos el prósimo 23 d’ochobre!
Fernán Morán, presidente de la Lliga Celta d’Asturies.
Lliga Celta d'Asturies 