VEZOS Y COSTUMES ASTURES: L’ANDECHA.

L’andecha o auxiliu mutuu de los vecinos en trabayos agrícoles, preferentemente d’urxencia como’l sallo de tierres, siega de yerba, corte de lleña, acarretu de piedra, esfoyaza, etc., o’n favor de vilbes, enfermos o ausentes, xeneralmente retribuida por aciu d’un refrixeriu, ta bien desaniciau n’actualidá. Nes antigües Ordenances del Principáu preveníase ya que nun se consentir a los poderosos faer vexame, por cunta d’ella, a los probes (Tuero Bertrand, F., Ob. cit., Ordenances de 1659, Tit. VI, Art. 5).

descarga

La so etimoloxía, diz Xovellanos, procede del llatín “indicta”, indicar, yá que ye necesariu citar a los vecinos por qu’asistan a l’andecha. Ya los sos motivos atópense, ensegún Inclán, na urxencia de los cambeos metereolóxicos ya l’escasez de xornaleros pa terminalos rápido, amás de la penuria económica qu’antaño pesaba sobro los nuesos llabraores pa poder pagar mano d’obra estraña.

images

Institución ésta que nun ye puramente económica nin les causes d’esti xéneru basten pa desplicala, porque análogues necesidaes siente y ventayes asemeyaes llograría l’agricultura perdayuri con esa mancomunidá’n que viven los llabradores asturianos. Hai que buscar, poro, la razón d’eses costumes, diz Costa, más bien nos motivos de calter xeneral, en condiciones especiales de la contorna asturiana, que pueden ser l’enerxía con que caltienense ellí les tradiciones d’antiguu, la viveza del sentimientu de solidaridá, el calter apacible y la cultura que falten n’otres rexones del estáu español.

37643_1

L’espíritu cooperativu de la andecha constitúi -diz Inclán Suárez – la base esencial sobre la que s’hai de llevantar el campu asturiano. Andecha actualizada, con una abonda mecanización, que ye lo que los modernos economistes agrarios denominen “agricultura de grupu”.

ob_f5603b_descarga

Ciertes semeyances cola andecha asturiana puen atopase’n Zamora. Tras-Os-Montes, Navarra y Vizcaya.

Fontes:

“Instituciones tradicionales en Asturias”, Francisco Tuero Beltrand; Ayalga ediciones 1976.

“La cooperación agraria astur, ayer y hoy”. Campo Astur nº 311. Xunetu-Agostu 1966.

Torna a l’asturianu: Fernán Morán.

Illustraciones y semeyes:

1ª.- Mayando, garabateando ya barriendo granu’n Mañones nel conceyu Tinéu nel añu 1927. Autor: Frizt Krüger. Fonte: Fonoteca’l Museu del Pueblu d’Asturies.

2ª.- Guetando castañes nel corripes del soto Sanantolín, nel conceyu d’Ibias – Asturies nel añu 1927. Autor: H. Walter Ebeling. Fonte: Google.

3ª.- Andecha de la cá Tomás en Niembru, conceyu Llanes, añu 2004. Autor/a: desconocíu/a. Fonte: Currículo Tercer Ciclu d’Ed. Primaria de Teresa Alvarez Acero.

4ª.- “L’Andecha”, pintau por Paulino Vicente nel añu 1925, angüañu nel Museu de Belles Artes d’Asturies.

 

EL CONVENTUS ASTURUM (parte I)

Peculiaridá de los ástures, que comparten colos pueblos del cuadrante noroccidental peninsular, son los conventos, esa rialidá republicana que va adquirir mientres l’Imperiu, y concretamente nesta área, nuéo puxanza y conteníu precisu fasta’l puntu que, comu indicose bien de vegaes, tantu enraigañu tuvieron que n’Antigüedá tardío siguía falándose como si’n rialidá inda esistieren.

asturia2

El conventu ye una circunscripción rial, ñatural, de nengún xeitu ficticia, qu’arrexunta entidaes humanes sentíes por Roma como homoxénees; asina, el conventus Asturicum asoleyaba puramente a los Ástures, acasu tamién a los Vacceos más septentrionales ensinón hemos de pensar que los Ástures más meridionales asimiláronse culturalmente a daquellos, mientres los conventos lucense y bracaraugustano asoleyaben a los Galaicos, recibiendo cada ún d’ellos a pueblos enteros ya’n nenguna manera fraccionaos.

division-administrativa-de-augusto

La razón d’esta homoxeneidá hebría que buscala’n tiempos anteriores a la presencia romana. Roma topóse ante unidaes etnografiques y recibioles nel senu l’Imperiu respetándoles enforma por cuantu yera’l meyor mediu viable pa ganase les sos xentes y les riqueces que la rexón contenía. Pasta tal puntu esta unidá yera real y fuerte, que caltúvose a lo llargo la vida l’Imperiu perenriba los avatares polo qu’ésti travesó y cola que formó una efímera provincia na dómina de Caracala, y Dioclesiano arrexuntó a Galaicos y Ástures na reorganización alministrativa qu’efectuó; dicha homoxeneidá ta tamién atestiguao nel reclutamientu d’auxiliares pa la defensa l’Imperiu. Hemos de pensar qu’éstos fueron incluyíos n’unidaes especialmente creyaes pa ellos ya les que dieron-y’l so nome, les cohortes y alae de los Ástures.

division-administrativa-de-diocleciano
A diferencia de los distritos, el conventum ye una realidá civil, con un marcáu calter territorial no qu’ocúpanos, nel que Roma exerz la so iurisdictio, entendiendo ésta nel so sentíu menos restrictivu, al traviés del gobernador de la Tarraconense o, nel so casu, per mediu de los legaos xurídicos p’Asturia y Gallaecia, onde tributase cultu al emperador nel senu l’asamblea conventual ya’l traviés de los sacerdotes nél establecíos, y que tien una capital o sede, centru neurálxicu de la rexón a tolos efeutos, que, pal conventus Asturicum foi Asturica Augusta, anguaño Astorga.

la_ciudad

Tal yera l’importancia d’esta urbs magnifica, comu calificala Plinio’l Vieyu, que nella moraben los procuradores, los legati iuridici, los sacerdotes del cultu imperial, el legáu de la lexón VII Gémina ya onde ratificaronse dellos pactos d’hospitalidá. Amás, l’importancia de dicha ciudá vien señalao pola relativa bayura de siervos y llibertos que l’epigrafía ufiértanos, nun faltando colexos d’augures, escuela de gramática y un colexu funeraticiu.

Fonte:

“Asturia prerromana y altoimperial”; Francisco Javier Lomas Salmonte; Colección Histórica Asturiana Ed. Silverio Cañada, Xixón, 1989.

Torna a l’asturianu: Fernán Morán.

Iustraciones y semeyes:

1ª.- Solar d’Asturia. Autor: Hugo Xabel Lavilla. Fonte: Google.

2ª.- División almenestrativa en conventos de la península Ibérica na dómina d’Augusto de los sieglos 7 al 2 enantes de Cristu. Autor: Antonio B. Fonte: Recursos Didácticos para la Ciencias Sociales.

3ª.- División almenestrativa en conventos de la península Ibérica na dómina de Dioclesiano nel sieglu III dempués de Cristu. Autor: Antonio B. Fonte: Recursos Didácticos para la Ciencias Sociales.

4ª.- Reconstrucción d’Asturica Augusta. Autor/a: desconocíu/a. Fonte: diviagusti.files.wordpress.

 

 

 

MITOLOXÍA ANIMAL ASTUR: LES CULIEBRES.

Toes elles son teníes por mui velenoses, anquen a rialidá nenguna de les culiebres asturianes tien velenu, a nun ser la Malpolon monspessulanus, que tien los colmiellos pa la parte d’atrás de la boca, polo que nun ye peligrosa pa la xente, y la víbora de Seoane (Vipera seoani), un endemismu cantábricu.

La culiebra ye otru animal emblemáticu de la mitoloxía asturiana. Del culiebru, el machu, dizse que, sigún miedra, va criando esnales d’esperteyu y una clinera per llombu, llegando a tresformase nun cuélebre, en delles lliendes con más d’una tiesta y de tamañu espantible. Cuando les escames se-y encascaren y se-y vuelven carpuyoses, y llega a ser mui vieyu, marcha esnalando pa la Mar Cuayada, a curiar los munchos bixos y tesoros qu’hai ellí guardaos.

bertu-pena

Dízse que cuando se xunten siente culiebres, una d’elles el cuélebre, ente la babaya y la galmiada que van soltando enriba la cabeza’l culiebru faen una piedra máxica, que val pa curar les picadures de culiebra o, n’otros casos, p’algamar la felicidá. Esa piedra de la culebra hai que la colocar enriba la picadura pa que suerba’l velenu, y dempués despégase ella sola y hai que la meter ente’l llechi pa qu’ellí suelte’l velenu.

Nunos casos dicen que ye azuleteada, verde, encarnada, escura… Suel tratase de fósiles o de cachinos de cuerna de venáos afumiaos. Plinio’l Vieyu falaba de la piedra de culiebra como d’una llienda perconocida ente los celtes de la Galia. Dicíase qu’había que la garrar con un mantu enantes que cayere al suelu. Los tiempos cambien, y en Valdeveru (Ayer) dizse qu’hai que la garrar con papel de fumar primero que toque tierra.

N’abondos bestiarios medievales fálase de culiebrones y dragones con piedres precioses na cabeza, igual que’l cuélebre asturianu. Dende l’áspide del Bestiariu d’Oxford (sieglu XIV), que tien una piedra que llamen carbunclu, la Dracontites, rubí máxicu que críen los dragones; al Coulubre, tamién llamáu Vouibre, de la fastera altu-alpina y de Saboya, que tamién ye portador d’una piedra preciosa na so testa.

El piñu de culiebres enroscaes que nel maxín popular tán faciendo esa piedra tien una explicación biolóxica: el celu de la Natrix natrix, una culiebra abondo conocida n’Asturies. Anque la fema, de mayor tamañu que los machos, n’esti mundiu de los mitos tómase por culiebru.

natrix

Otra historia mui espardida ye que, si cai al augüa d’alguna fonte un pelu de muyer o una clin de caballu, acaba tresformándose en culiebra. Hai entós que dicir dellos arrezos y esconxuros pa poder beber ensin tragalu, porque si non llega ún a criar un culiebra dientru. Por exemplu, en Llanes, Ribesella y Caravia, recitaben:

“Xesucristu mio dio’l vinu,
Santa María mi dio l’augüa,
Si hai dalguna gafura
Que di tres soplíos se mi vaiga”.

Tamién tien una desplicación biolóxica. Trátase d’un guxán (Gordius sp.) que pasa la so primer fase de viérbene parásitu dientro de los escarabayos, pa dempués salir ya formáu dultu col aspeutu d’un pelu llargu, cola cabecina blanca, como arrincáu de raíz, y reproduzse nel augüa de les fontes.

En munches llendes d’encantos, la xana tresfórmase en culiebrón pa desixir a los sos pretendientes que-y dean tres chuchos en focicu si ye que quieren desencantala y quedase cola so dote, que yera un tesoro fabulosu. Eso sí: nun pueden nomar nin a Dios nin a los santos. Pocos son los que lleguen a algamar esa fortuna. N’otres hestories encanten a una moza baxu la forma d’una culiebra, bien seya dalgún bruxu o’l padre de la rapaza, que quier castigala asina por namorase d’un mozu que nun ye del gustu de la familia.

cuelebre

En Naviegu (Cangas del Narcea), cuéntase qu’un cazador de Tresmonte, tando al recechu nuna braña, vio llegar un vaqueiru d’a caballu con una rapaza que llevaba les manes amarraes al ray’l caballu. En llegando a un sitiu posóse y foi lliendo per un llibru de “Mágia Negra”, mientres qu’ella diba fundiéndose na tierra. Cuando namás que-u quedaba la cabeza fuera, dixo ella: “¿Cómu voi poder salir d’eiqui)”. Contestó’l vaqueiru: “En forma de culuobra a calentate al sol”. “¿Ya cuándu me desencantaréi?”, entrugó ella. “Cuando estas brañas se semen cun sal”. El vaqueiru marchó y el cazador non tuvo más que volver díes dempués y semar la braña con sal, desencantando a la moza. Por eso-y quedó a la braña’l nome de Saldepuesta.

El linaxe de los Miranda d’Asturies dizse que bien d’unu que casare con una xana o una encantada qu’atopó al pía d’una fonte, y qu’una nueche del añu volvíase culiebra. Asina lo recoyó Tirso d’Avilés (1517-1599), y trátase de la mesma llienda de La Fada Melusina y el señor de Lusignan del Poitou francés, recoyida por Jean d’Arrás p’hacia’l 1352-1387. Tratábase, con estes hestories, de reforzar los linaxes faciéndolos descender de casorios con divinidaes tutelares que, col cristianismu, acabaron arrequexaes comu fades y manifestaciones del diañu.

Ente los remedios pa curase del velenu de les culiebres, amás del emplegu de la piedra la culiebra, la más conocida yera fender una varina verde d’ablanu y ponela na picadura. Dicíase que diba sorbiendo’l velenu y poniéndose anegrazada. Sigún diba sorbiendo había que dir pelándola, hasta qu’acabase de chúpalo too.

talla-madera-asturiana-wiki

Nel barriu Les Melendreres, en San Andrés de los Estacones (Xixón) poníen una moneda d’oru enriba la picadura. N’otros llugares (Ayer, Grau…) poníen un pitín abiertu al mediu. Fendíase tamién la picadura con una navaya, y poníase ayu enriba. L’ayu qu’afuxentaba culiebres y bruxes.

En Cornoyo (allande) xuntábanse cuatro varines d’ablanu y un platu d’augüa, y dicíase nueve veces:

“Estando la culebrina rayando al sol
La cola enriba la cabeza,
La cabeza enriba la cola,
Taba xurando ia botando,
Que todo lo que mordiera
Tía que reventar
Diz Cristo:
Mierda pa ti, que non ha de ser así.”

Mientres tantu, facíense siete cruces coles varines d’ablanu.

En Rubléu Teinás (Cangas del Narcea) garrábense de nueve cimes d’artu y rustíase faciendo nueve cruces na picadura. Con cada fueyina dicíase una oración y, según diba acabándose de dicir, tirábase la fueyina al suelu. La oración yera la silguiente:

“Tando la culuebrina ya’l Culuebrón
Calentándose a lus rayos del sol
Xurando ya butando
Los siete mil dioses
Donde sou lengua ha de cincar
Ou ha de rabiar ou ha de reventar,
Respuéndele Cristu:
Dile qui miente, dile qui miente,
Mientras qu’estas nueve cimas d’artu florecen
Que nunca florecerán
Nun ha d’importar.”

La riestra de variantes sería abegosa de poner equí. N’otros pueblos, les nueve fueyines teníen que ser de carbayu o roble albar. En villabona (Llanera) había que garrar la culiebra causante de la picadura y quemala, pa dempués esfregar cola ceniza. N’Ardisana (Llanes), afumiaben a les oveyes mordíes pola culiebra con un bote al qu’echaben nueve yerbes a quemar, ente les quetaben la flor de sabugu, grana d’herba, oriéganu, ayu y triaca.

aleru-palaciu-la-costanella-lne

Dicíase entós, que l’oveya echaba’l velenu poles ñarres. En dellos pueblos del Valledor (Allande) colgáben-yos a les vaques del pescuezu un saquín con lloréu, ayu, arenines de sal y la trincha d’unos pantalos pa que les culiebres nun les picaren.

En Llongrezana (Carreño), dicíase, p’atontar a les culiebres y que nun mordieren:

“Encántate, culiebra,
Ánxeles siete
Piedrines de mar
Piedrines de sal
Nun te muevas d’equí
Hasta que nun te busque
Piedra o palu con que te dar”.

Si’l palu yera d’ablanu, meyor, bastaba con tocala un pocu p’achuquinala.

En Teberga dicíase que la sierpe retrucaba:

“Anque las tripas me saques
La cabeza nun me maches
Que d’aquí al vienres
Ya criaré yo tripas bastantes.”

Dende siempres llamó l’atención que la culiebra mudare de piel, de camisa, y pareciese un animal “nuevu” baxu d’una pelleya vieya. Por esu, munches cultures tuviéronla por inmortal o símbolo de reencarnación. La camisa de la culiebra tien en toa Asturies propiedades milagroses. Dizse que si se mente nel bolsu d’una persona ensin qu’esta llegue a dase cunta, dará-y suerte nel xuegu, n’especial nos de cartes, comu’l tute o la brisca. Enroscada alredor de les vidayes quita’l dolor de cabeza. En dellos casos dicíase qu’había que la recoyer nuna bandexa de plata.

Los mariñanes de Carreño (en Llogrezana) mataben una culiebra y dexábenla secar pa qu’esmondare bien. Entós enrollábenla y llevábenla con ellos cuando diben a pescar pa la mar, porque creyíen que-yos daba suerte y que los protexía de naufragar.

silleria-del-coro-de-catedral-uvieu

Espardíu pela xeografía asturiana, ta l’emplegu del untu de culiebra pa curar la reuma, dando friegues. Llegó a comercializase en botes trayíos de les Amériques como “Grasa de Víbora”. Depués de muerta, dexándola ensugar nel llar, facíase caldu con ella y dábase-yos a beber a lso tullíos y a los artríticos.

Les cualidaes melecinales del untu de culiebra apreciábense munchu na Europa medieval. L’esqueletu de víbora cocíase pa les fiebres altes nos Alpes. En Marche (Italia), los ciaraulli, una especie d’ensalmadores culiebreros, andaben peles feries y mercaos vendiendo una pomada pa les malures fecha con untu de víbora. Yera famosa la Theriaca veneciana, un ungüentu fechu, ente otres coses, con grasa de víbora. N’Asturies tamién se conoció esta pomada, dicíase que, nel sieglu XIX, el farmacéuticu Juan Bautista Agosti Paleare, n’Uviéu, facía “una eficacísima triaca, a su juicio mucho mejor que las venecianas”.

Otra llienda al rodiu de les culiebres, mui espardida, ye la de que mamen a les vaques y a les muyeres. Dizse que la vaca nun dexa mamar al xatu y que llega a ponese a iñar llamando a la culiebra pa que la mame, porque ye mui placentero. Dizse: “mama mui dulce, como les culiebres”. A les muyeres éntra-yos el suañu cuando tan dando la teta al neñu, y entós la culiebra pónse a mamar y méte-y el rau al neñu na boca como si fuera’l chupu, pa que nun berre. El neñu nun miedra y enflaquez, queda amasteladín, hasta que, en delles hestories, l’home ponse a curiar y ve baxar la culiebra perl pegoyu l’horru onde ta danto de mamar la muyer. Entós d’un guiyadazu, esfarrapa la culiebra, qu’esparde tol llechi pela caleya.

Biolóxicamente, les culiebres nun tienen la boca adautada pa sorber, nun pueden mamar. Trátase d’una llenda mui vieya: l’abandonu de la madre nutricia, nel casu de la vaca. Ye símbolo del placer sexual. En dellos capiteles del románicu, el pecáu de la Luxuria represéntase con una muyer col sexu ofrente, a la qu’una culiebra mama de los pechos.

santa-maria-de-yermo-asturias

Dizse tamién que la so mirada hipnotiza xente y animales, y que prevoca’l suañu. Les culiebres nun tienen párpagos, lo qu’esplica’l so mirar fixo. Hai una cosadiella que se refier a esti tema:

“Señoríta tan el campo
Vestida de verde paño.
Lo que ve
Prendado se queda”.

La culiebra anuncia’l tiempo que va venir, la llegada o’l retrasu de la primavera. Na mitoloxía céltica, la culiebra ta venceyada a Brigit, la diosa de la fertilidá, que s’aparez, al biltar la primavera, con ella cinxéndo-y les vidayes.

N’Asturies dizse:

“Si la culiebra sal enantes d’abril,
L’inviernu tan por venir.
Si la culiebra sal enantes d’abril,
La nieve la tien que cubrir.”

En munchos conceyos asturianos creyíase que les culiebres, cuando diben a bañase al ríu, dexáben el velenu guardao debaxu d’una llábana, y que, si dalguién-yos lo robaba, llegaben a matase elles mesmes tirándose escontra d’una piedra.

Otri árbol del qu’afuxen les culiebres ye’l fresnu. Feijoo (Teatro 2, discursu 2, num. 45), afirmaba, nel sieglu XVIII, que les culiebres queríen más tirase al fueu enantes que metese ente les cañes de fresnu.

Otres plantes emplegaes escontra d’elles y les sos picadures son la ruda (Ruta graveolens), el llantén (Plantago lanceolata), el chapezu o viborera (Echium vulgare) y la xiniesta (Cytius scoparius).

Fonte:

“Animales Míticos d’Asturies”; Alberto Alvarez Peña; Ed. VTP 2003

Illustraciones y semeyes:

1ª.- Cuélebre. Autor: Bertu Peña.

2ª.- Grupu de culiebres /Natrix natrix) copulando. Autor/a: desconocíu/a. Fonte: Fundación Osu d’Asturies.

3ª.- Cuélebre. Autor/a desconocíu/a. Fonte: grimoriodebestias.blogspot

4.- Talla de maera d’un cuélebre asturianu. Autor/a: desconocíu. Fonte: Wikipedia.

5ª.- Detalle de Cuéllebre tallau nun aleru’l Palaciu la Costaniella’n Sobrefoz, nel conceyu Ponga. Autor/a: desconociu. Fonte: diariu LNE.

6ª.-  Cuellebre tallau na Sillería’l Coro na Catedral d’Uviéu. Autor/a. desconocíu. Fonte: Google.

7ª.- Capitel románicu  de Santa María de Yermo, Cantabria, na que vese una muyer con un guah.e de la que mamen les culiebres.. Autor/a. desconocíu. Fonte: Asturnatura.

CONFERENCIA: LA SIDRE BÉBORA ASTURIANO, BÉBORA RITUAL.

Güei pola tardi aconceyamos delles persones pa sentir la perprestosa conferencia qu’impartió David M. Rivas sobro la bébora nacional d’Asturies, la sidre.

juan2

A lo llargu d’una ponencia maxistral, David fízonos un recorríu dende l’entamu del consumu de sidre ensegún les fontes clásiques ta’l chigre actual d’angüañu.

p1050280

Tuvimos de too: hestoria, antropoloxía, lleendes asturianes, etnografía, utillería… en fín, una conferencia con abonda y variao información sobro la sidre asturiano ya los ritos y costumes venceyaes al so consumu, desplicando tolos conceutos y datos de xeitu mui ameno y afayaizu pa tolos públicos.

juan3

Dende la Lliga Celta d’Asturies nun mos queda más qu’agradece-y a David la so collaboración con nosotros comu ponente, a toos y toes vosotros/es qu’averástivos esta tardi a sentir la ponencia y, por supuestu, a la biblioteca pública Ramón Pérez d’Ayala pola so disposición y collaboración prestao.

Un candial saludu pa toos/es ya espero atopavos na prósima… haxa salú!

Fernán Morán, Presidente de la Lliga Celta d’Asturies.

Semeyes:

1ª.- Presentación de Fernán Morán, Presidente de la Lliga Celta d’Asturies de la conferencia sobro la sidre asturiano. Autor: Juanjo Arrojo.

2ª.- Ponencia de David M. Rivas sobro la sidra asturiano. Autora: Anto.

3ª Conclusión de l’eventu. Autor: Juanjo Arrojo.

CONFERENCIA: LA SIDRE, BÉBORA ASTURIANO, BÉBORA RITUAL.

Bones a toos/es, dientru’l Programa Anual d’Actividaes de la Lliga Celta d’Asturies, David M. Rivas, profesor titular de l’Universidá Autónoma de Madrí, miembru de l’ALLA y’autor del llibru “La sidra, bebida ritual y símbolo”, impartiranos una conferencia sobro la bébora nacional d’Asturies, la sidre asturiano, falándonos de varios aspeutos rellacionaos pa con ella.

sidradeasturias-300x194

Fuelga dicir que sedrá una conferencia perprestosa ya interesante a la qu’esperamos veros a toos/es el prósimu 12 setiembre a les 19:30h na Sala Conferencies de la biblioteca pública Ramón Pérez d’Ayala d’Uviéu (la del Fontán de tola vida), na que podremos sentir abondes coses alrodiu de la bébora asturiano por escelencia de la boca d’un braeru espertu.

CarteluSidre

Haxa salú pa toos/es!

Fernán Morán, Presidente de la Lliga Celta d’Asturies.

NOTA.- El cartelo pon comu hora de comienzu de la conferencia les 11:30, por motivos ayenos a nos tuvimos que camudalo a les 19:30h polo que la hora d’entamu de la conferencia ye a les 19:30h del 12 de setiembre de 2016.

Semeyes ya illustraciones:

1ª.- Escanciu d’un culín de sidre asturiano. Fonte: Google. Autor/a: desconocíu/a.

2ª.- Cartelu oficial de la Lliga Celta d’Asturies del eventu, diseñu de Vítor González.