ESPOSICIÓN: «INDUMENTARIA Y ARMAMENTU DE L’EDÁ DEL FIERRO».

Otru añu más tenemos el preste de participar como organización collaboradora nel Festival Intercélticu d’Avilés y Comarca nesti añu, la XXIV edición, entamando una esposición sobro l’indumentaria y armamentu de l’Edá del Fierro.

L’esposición ta allugada na planta baxa del Palaciu de Valdecarzana d’Avilés, na cai Sol, y tará espuesta dende güei, llunes 20 de xunetu ta’l vienres 25 de xunetu n’horariu de visita habitual de les instalaciones.

L’esposición ye un percorríu pel que los/es visitantes dirán atopando elementos sinificativos y arquetípicos venceyaos a l’indumentaria y armamentu de nuesos/es ancestros/es de l’Edá del Fierro.

Podemos atopanos con caletres o escudos comu elementos de defensa y ataque.

Espaes, puñales y fachos de doble filu.

Fondes, arcos, carcajs con fleches, mochiles de piel de cabra.

El cientru, por así dicilo, de l’esposición son dos maniquís, que representen a un guerreru de l’Edá del Fierro y a una muyer de la mesma dómina vestíos comu tales. Los/es visitantes podrán decatase de que dambos cunten colos elementos arquetípicos esenciales diferenciadores de la dómina referíos poles fontes grecorromanes más estudiaes, comu por exemplu l’obra Geographica, escrita por Estrabón nel sieglu I dne.

Esta esposición nun pretende ser una recopilación de calter académicu puru, sinón más bien una ventana al mundu protohestóricu, tantu asturianu, comu d’otres estayes europees y fomentar l’interés pel mesmu asina comu l’entretenimientu y esfrute de los/es sos visitantes.

Dende la Lliga Celta d’Asturies, queremos agradecer mui especialmente la collaboración d’Arqueros de Teverga, asociación recreacionista asturiana que prestonos material pa facer esta esposición; a l’asociación recreacionista Astures y Romanos de Carabanzo (L.lena) y en concretu a Miki, pola mesma razón; a l’aociación Esbardu, qu’entama el Festival Intercélticu d’Avilés y Comarca por siguir confiando y cuntando con nos pa la realización d’eventos dientru del so festival y al personal del palaciu de Valdecarzana pola so inestimable collaboración a l’hora de facer la presentación de l’esposición y montaxe la mesma; y cómo non, a nueso compañera Carmen, por tar ehí aidando nel montaxe y sacando toles semeyes pa facer esti pequenu reportaxe.

Fernán Morán, presidente de la Lliga Celta d’Asturies.

Semeyes de Carmen M., semeyera y miembru de la Lliga Celta d’Asturies.