ACTIVIDAES DE LA LLIGA CELTA D’ASTURIES: VISITA GUIAO A LOS CASTROS DE CUAÑA Y PENDIA.

Bones tardes a toos y toes, una vegada más, dientru’l nuesu Programa Anual d’Actividaes pal 2016, tenemos el gustu de convidavos a un eventu que paéznos  va ser, amás de mui didácticu ya interesante, perprestosu y entreteníu.

El prósimu díi 16 de xunetu, Angel Villa Valdés que ye Dr. n’Hestoria y arqueólogu venceyau al Museu Arqueolóxicu d’Asturies, amás d’haber sido’l creador y responsable del Plan Arqueolóxicu Direutor de la cuenca’l Navia-Eo, polo que dirixió/participó en delles escavaciones feches nos dos castros, tantu Cuaña comu Pendia; va proporcionanos la posibilidá de facer una visita guiada por él a los dos castros. Esta ye, na nueso opinión, una oportunidá comu poques pa los/es que tamos ñamoraos de la nueso Hestoria y la cultura de nueso, de poder facer entrugues sobro estos dos castros ya les escavaciones de so que nun vienen en nengún manual… y de baldre!

Amás del tema didácticu y cultural que ta perbien, sedrá un díi nel que podremos aconceyanos varies persones de too’l país y fora d’él, conocenos, y pasar una xornada’n xuntanza compartiendo idegues, conceutos y, por supuestu, munches rises.

El planning pa esta actividá sedrá’l siguiente (salvu modificaciones que puéan xurdir por causes ayenes a nos):

11:00h.- Aconceyamientu nel puntu d’alcuentru que sedrá l’aparcamientu del Centru d’Interpretación del Castru de Cuaña y presentación de l’actividá por Fernán Morán, Presidente de la Lliga Celta d’Asturies.

De 11:15 a 13:30h.- Visita guiada por Angel Villa Valdés al castru de Cuaña.

De 14:00 a 16:30h.- Xinta d’un menú del díi n’algún chigre de la zona (esto ye opcional y pagarase ca ún/a la xinta de so).

De 16:45 a 18:00h.- Visita guiada por Angel Valdés al castru de Pendia y fin de l’actividá.

Espero veros a toos/es per ellí y pasar un díi ablucante y mui didácticu’n xuntanza. Salú!

Fernán Morán. Presidente de la Lliga Celta d’Asturies.

CarteluCuañaPendia (1)

¿QUÉ ATALANTAMOS POR CELTISMU?

Güei vamos recuperar una migayina de l’hestoria de la Lliga Celta d’Asturies; n’esta vegada, vamos ufrecevos un artículu espublizau na espublización de la Lliga Celta d’Asturies que nomábase ASTOR allá pel añu 1983.

img520

Anque pasaron ya más de 30 años, salvo pequenísimos matices, esta sigue siendo la filosofía de la Lliga Celta d’Asturies, esperamos que vos preste esti maxistral artículu.

Ye abegoso dar una definición de “celtismu” teniendo’n cunta que los Celtes nun fixaron la cultura de so cola escritura, polo que nun disponemos de les sos idegues esplícites o concretes. Almitiendo esta fastera, la nuesa asociación atlanta’l celtismu comu un de los factoes que conformen la especificidá de la cultura asturiana y que tien de común colos demás, el tar en trance desapaición, al vese afeltau dende cuantayá, per munches presiones exercíes per otres cultures, que si se imponen ye pela fuercia que se-yos da -direuta o indireutamente- y non per ser les meyores, sigún un “destín universal”.

La Lliga Celta d’Asturiesm enfotada’n caltener qu’el Pueblu Astur y la cultura de so nun espaeza, decició da-y primacía al fatore célticu, abondo escaecíu gracies a esi llabor de lo que podríamos nomar comu “romanomanía”, la cuala cuaya na mente d’abondos asturianos que considérense -nel so sen vulgar y tópicu- como “llatinos”, “mediterranios”, o descendientes d’una esplosiva amestadura ente romanos e íberos. Nun ye d’estrañar. Tamos acostumaos a que mos borren ya intenten faer una xagoza del periodu hestóricu nel qu’el País Astur arrecibió la bas étnica y cultural so la que xorreció el pueblu asturianu, amestandose con otres aportaciones -menores no étnicu, mayores no cultural-. Graces a esa bas céltica, angüaño caltenemos una xenuína idiosincrasia y estremadura d’otros pueblos. Esi periodu que nel mundu conozse comu “época d’apoxeu de la civilización celta”, acá acostúmase a nomalu col eufemismu de “época prerromana”, oseya, de la Edá’l Bronce fasta la invasión melitar romana.

castro_coana_t3300102.jpg_1306973099

La hestoria científica europea demuestra lo que dellos otros hestoriadores oficialistes estatales nieguen: que la bas celta yera la principal cuando los romanos llegaron al País Astur, asina comu que l’ocupación romana foi cuasi esclusivamente melitar, ya que n’aquellos tiempos la colonización taba dirixía a otres zones de l’Emperiu Román -comu la Dacia-, a más de nun ser el nuesu país de porgüeyu pal colonu, enfotau per aquelles époques cola poducción del trigo. Pala esplotación d’oru bastaba col asentamientu melitar, que delles vegaes usó de los castros celtes, lo cualo sirve a dellos axetivar a los poblaos astures de “romanos o romanizaos”.

La romanización d’Asturies, qu’ente otres coses fizo espaicer les llingües gaéliques falaes nes tierres, foi más bien obra de la cristianización. Foi col cristianismu y non colos melitares romanos, cuando la civilización romana entamó a caltriar con toes les sos consecuencies nel País Astur.

mapaasturias54--647x350

Pero nun per esu vamos cayer na celtomanía y falar de races. Semos los primeros en reconocer que los Celtes, nin foron raza, nin foron imperiu. Foron un conxuntu pueblos cosanguinios con propia individualidá y ayenos a idegues emperialistes, comu la Hestoria y el presente encárguense de demostrar. Tampocu vamos pretender redescubrir poemes d’Ossian, perque nun queremos cayer na falsedá o’l folclorismu, comu Macpherson y perque sabemos que la nuesa llingua ye romance, y comu tal, tien la cadarma llatina, anque caltenga dellos términos, raigones, peculiaridaes y topónimos gaélicos.

Nun tenemos na que ver colos movimientos del siglu pasau comu los de Murguía, porque queremos salvar la cultura de les garres de la política. Amás, danse otres condiciones y tamos n’otros tiempos.

Escribimos en llingua asturiana porque ta rellacionao col celtismu nel sen de que tamién ta en pelligru d’espaición y porque los Astures siempres demostramos un gran amosr polo de nos y lo que de ficimos de nos comu pueblu con calter cerbunu ya independiente. Quiciabes per mesmu motivu Cervantes escribió “El Quixote” en castellán y non n’íberu.

arbol-palabra-3

Sabemos que los Astures, neto a los demás celtes, praticaben una relixión de tipu panteista-animista. Adoraben a la Natura comu tala y los sos fenómenos, ensín necesitar de menistros que “almenestrasen” lo que yera de toos/es, per nun ser de naide. Nos , participamos d’ello y creyemos tener una ñátura esteticamenti adoratible, magüer tar atacada y espoliada per tolos llaos. Poro, pruyemos el guxán de l’ecoloxísmu, pa contribuir a crear la forcia qu’esti movimientu tien de tener n’Asturies, país que posee una gran ñátura, pero tan en peligru d’estinción comu’l Celtismu y la Llingua. La nuesa xera nesti fatore sedrá per agora informar y denunciar daños al patrimoniu natural de toos los asturianos.

Paez ser que los Celtes nun usaben de la escritura, o al menos, non de la forma qu’angüaño la concebimos perque temíen que les pallabres, al fixase’n siños, camudarense nel instrumentu de la mentira. Güei, munches idegues y sentimientos de los asturianos son falses dafechu, por tar edificaos so un pasau hestóricu tracamundiau al serviciu d’otres idegues y plantegamientos que mos son ayenos. Queremos emesar la hestoria de nos, de la man la cencia, la crítica y l’oxetividá, pa contribuir a la curación d’esi cáncanu llamau manipulación. Intentaremos francer esa cadena tópicos romanizantes, castianizantes, “paniberistas”, o cualisquiera otros que pongan en peligru la nuesa especificidá comu pueblu, pero ensín cayer n’un especismu o maniqueismu a los Walter Scott, perque con abondo “grandiosismu” arrecostinamos ya.

Puestos a caltener, tendremos mui en cunta eses costumes y vezos qu’informaron delles instituciones xurídiques asturianes y que deben cuayar n’una compilación del Drechu Foral Asturianu. Nun tamos d’alcuerdu cola fras de Posada Herrera: “Asturies renunció a les sos llibertades y fueros pel bien de l’unidá d’España”. Nos, entá estremamos ente renunciar, y que te faigan renunciar.

11224119_930334917005985_370499306055501524_n

Nun escaecemos la situación xeográfica del nuesu país, a la vera l’Atlánticu, un océanu abiertu al mundiu. Semos atlánticos, dende anantia los Celtes y quiciaves d’ehí el talante abiertu y la idiosincrasia aventurera del Astur en particular, y del Celta’n xeneral, que fai’l qu’atopemos asturianos, irlandeses, gallegos o escoceses en cualisquier requexu’l mndiu. Poro, quier ser la nuesa una cultura abierta, que nagua por contribuir a la cultura universal modestamienti, pero comu pueblu, ensín tener que pasar per intermediarios. De sobra sabemos per esperiencia que la cultura estatal pretende “uniformar”.

Daquién creya que semos ciarraos, que pasamos la vida mirando pal embeligu de nos, ta nun pilancu. Los vraeros nemigos de la cultura universal son los que la tresmanen cola estatal, viendo sólo un embeligu mayor qu’el que mos achaquen a nos, col agravante de qu’el suyu ye de plesiglás y del cualu nun saben sortir si nun ye pa competir con noxu respetu a les otres cultures estataliegues. D’ehí saler les Torres de Babel. Ehí ta’l vraeru nemigu la cultura universal y non na cultura los pueblos.

Nos nun vamos perder el tiempu lloramicando pala pérdida de Cuba y les Filipines; desconfiamos d’esos caberos bastiones de la Xeneración el 98 que vienen a abellugase n’Asturies, y con esto fayendo angüaño verdá’l mitu Cuadonga, a fines del sieglu XX. Tamos más esmolecíos en hermananos colos pueblos. Al respectu, nun sólo caltenemos relaciones culturales colos demás Países Celtes, sinín que tamién con otros vecinos y nagüamos por siguir aumentando’l intercambiu cultural, perque sabemos que n’elli ta’l futuru d’una auténtica cultura universal al serviciu l’home y non del Estau.

cfcee62b31fe6302eeb1366ce198c628

Había nos Celtes otres idegues y concepciones que podríen ser adataes y esporpollaes nestos tiempos, comu puén ser la consideración que tinía la muyer hai 2500 años ya y que gracies a la cultura “xudío-greco-romana” y les sos consecuencies, perdímosla.

Tamién podríamos falar de la forma de concebir la propiedá y los sos frutos comu de la colectividá, qu’entá subsiste en delles manifestaciones del nuesu sector agrariu, y magüer l’imposición d’unes lleis que s’acomoden mayor a otres tierres y otres xentes.

Finamos nagüando per dellos ideales de los nuesos ancestros que resúmense na so forma de vivir: n’envidiables armonía cola Ñátura.

Y esto ye lo que la Lliga Celta d’Asturies atalanta por: CELTISMU.

Fonte.

Introducción: Fernán Morán. Presidente de la Lliga Celta d’Asturies

Artículu: Revista ASTOR nº5, Uviéu n’abril de 1983.

Semeyes ya illustraciones:

1ª.- Castru de Cuaña. Autor: Turespaña. Fonte. Google.

2ª.- Mapa de la división romana del País Astur. Fonte: diariu El Comercio.

3ª.- Texu de Bermiegu’n Quirós. Fonte: diariu LNE.

4ª.- Mapa de les Naciones Celtes.

5ª.- Pareja de Astures. Fonte: Museu Arqueolóxicu d’Asturies. Autor: desconocíu.

 

SOLSTICIU DE BRANU

 

ISLA-LA-DEVA-1160x650

Dientru de poques hores el mundiu terrenal ya’l mundu feericu abriranse l’unu al otru, nos prósimos díis danzaremos comu’l pueblu que somos, los/es Astures; el fuéu, la llume, purificaranos pa siguir el ciclu y munchos/es de nos coyeremos la Flor d’Augüa n’alborada…

FELÍZ SOLSTICIU!

Fernán Morán; Presidente de la Lliga Celta d’Asturies.

Semeya: Isla de Deva – Asturies. Autor: Javier Seija. Fonte: google.

SOLSTICIU DE BRANU N’ASTURIES: LA NUECHE DE SAN XUAN.

Yá’l sol algamó el puntu más altu del so camín: Ye’l solsticiu de branu, el mediu dí del añu, el dí de más lluz y la nueche más curtia. Y ainda les fogueres pretenderán desvanecer les sos solombres. San Xuan cellebra la plenitú solar.

miki lopez oviedo

La Nueche de San Xuan ye nueche de prodixos, d’espíritos, de máxica virtú. Toles fuerzes sobrenaturales, de la tierra y del aire, del fueu, de les agues, añublen al filu de les doce campanaes de la medianueche. Entama el reinu de los presaxos, de les fechiceríes y conxuros…

Los mortales faen fogueres nes antoxanes de les cases o nes encruciyaes pa afuxentar a los malos espíritus y salten sobre elles p’allexar a les enfermedaes durante tou l’añu. Col fueu d’estes fogueres encienden unes fachos de yerbes qu’acerquen a los aperios de llabranza para allonxar a les plagues de les colleches.

20min

N’esta nueche, les xanes salen de les sos cueves y de les sos maravioses cases nos manantiales; ye cuando más filen, cuando más tienden la ropa, cuando más se peñen y cuando más xueguen a los bolos a la vista de los homes. Poles grietes de les roques salen pites que ponen güevos de los que salen pitinos d’oru… y dalgunes montañes tórnense d’oru o de plata y de les sos fontes manen ayalgues en llugar d’agua…

Ye’l momentu afayaízu pa recoyer les yerbes máxiques nes viesques, que deberán ser recoyíes n’esta nueche, ser puestes nos umbrales de les puertes y guardaes la mañana siguiente col oxetu de que sirvan pa facer ferviatos contra les enfermedaes durante tou l’añu. Una planta mui codiciada n’esta nueche ye la de la buena ventura: El trébole de cuatru fueyes. Esta planta proporciona al so poseedor buena suerte na gueta d’ayalgues ocultes nes viesques.

culturaceltarefugio.blog

Yá que los espíritus del mal tan esbilitaos, ye n’esta nueche cuandu los fechizos se rompen y los aventuraos pueden derrotar a los cuélebres y desencantar a xanes que tuvieron prisioneres durante sieglos y conseguir el so fabulosu tesoru.

Na madrugada de San Xuan, cuandu’l Sol sal brillando pel horizonte, xuega un papel mui importante la recoyida de la Flor d’Augüa, que ye la rosada dexada polos ventolinos, y a la cual se-y atribuyen propiedades máxiques y curatives. N’Asturies esiste una espresión que ye la de “llavase cola Flor d’Agua” y que ye revolcase desnudu sobre la yerba pa impregnase así de la rosada bendita: Trátase d’una costume ancestral que ye necesariu siguir pues conozse el casu d’un pastor al cual varies encantaes no-y regalaron una vaca por nun habese “llavao” esa nueche. Córtense tamién les flores de sabugu y colóquense na ventana pa que reciban la bendición del Santu, anque ye necesariu retiralo enantes de que salga el Sol, pues de lo contrariu esapareceríen del sabugu toles sos máxiques virtúes.

4981766027_e9f46ee921_b

L’astru rei, el Sol, representa un papel mui importante na vida del pueblu asturianu dende la nueche los tiempos: Gracies a él florecen les flores nos campos, crecen y maduren les colleches, y, en fin, ye imprescindible, pues sin él la tierra quedaría sepultada baxo los xelos. Pero el Sol tien tamién propiedaes máxiques que fueron acertadamente detectaes polos ocultistes de toles époques.

Yá na dómina prerromana, el dios-sol Lug yera la divinidá suprema de los astures, antecesor epónimu de los habitantes d’Asturies centro-oriental, los Luggones, que diben cada añu al nemeton (claru na viesca) de Llugo de Llanera (Lucus Asturum) a rendi-y cultu. Más tarde, na Edá Media, el rei Fruela treslladó sospechosamente la capital del reinu de Cangues d’Onís a Uviéu, non mui lloñe de Llugo de Llanera, y magar entós entamen apaecer en munchos hórreos ya ilesies de toa Asturies símbolos relacionaos col poder solar: El triskel, que simboliza tanto’l movimientu cíclicu del Sol, que naz y renaz cada día y cada añu, como la integración de los 3 elementos de la ñatura (agua, aire y tierra) ; la roseta o rosa de los astures, que representa al Sol fertilizando a la tierra y que pa los asturianos actuales ye la flor del agua que, como vistis, ye aquélla que naz na madrugada del día San Xuan, tres ser tocaes les agües polos rayos d’un Sol nel so apoxéu. Pero el sinificáu real y profundu de toos estos símbolos sólo yera conocíu polos antiguos monxos qu’habitaben aquéllos monasterios yá deshabitaos, y de los cuales nun salió xamás el secretu.

img090

Palos campesinos d’anguañu el Sol ye simplemente un guardián frente a los malos espíritus, y así invoquen a Xuan de Riba o Xuan Blancu pa conxurar a la neblina:

Escampa, nublina,
de val.le en val.lina,
regueiros abaxo,
canales arriba,
que ahí vien Xuan Blancu
jurando y votando
que te ha de comer
con su mucher barbuda
y a sua perra l.lanuda

El Sol ye repulsor de los espíritus malinos, y esta ye la razón que nel día de San Xuan el cuélebre y tolos fechizos malinos sean vulnerables. Pol contrariu, na otra parte del añu, nel Día de Tolos Santos y nel Solsticiu d’Inviernu, los espíritus del Inframundu invaden el mundu los vivos aprovechando la debilidá solar y convién afuxentalos mediante rituales. Durante los Eclipses de Sol ye necesariu llevar a los perros a la casa pa que nun rabien, y llevar a les vaques a les cuadres pa evitar qu’enfermen. Y ye qu’al apagase el sol espárdense otra vez tolos malos espíritus, y pueden metese nel ganáu, y guardar na verdura, y agazapase na yerba que les vaques acaben de comer.

Fernán Morán / Jose M.R.

Semeyes ya illustraciones:

1ª.- Danza Prima na foguera San Xuan d’Uviéu 2012. Autor: Miki López. Fonte: google.

2ª.- Foguera San Xuan en Xixón. Autor/a. desconocíu/a. Fonte: 20 minutos.com

3ª.- Detalles de Flores d’Augua tamién nomáes Flor Galana o hexapétala nun horru asturianu. Autora: Jacinta Llunch Valero.

4ª.- Triskel cola inscripción “Asturies nación celta”. Fonte: Andecha Astur.

 

CONFERENCIA: EL SOLSTICIU DE BRANU NA CULTURA ASTUR.

Ayeri 10 de xunu de 2016, comu nun podía ser d’otru xeitu, Bertu Peña dexónos a toos ablucaos y con ganes de más dempués de sentilu n’una ponencia perprestosa na que tocó los finxos más interesantes del tema la conferencia y desendolcolos d’un xeitu perafayaízu y didácticu a la mesma vegada.

P1050214

Falonos del sinificáu de los solsticios, de la so adoración, el so venceyamiento a ciertos dioses celtas, xermanos ya romanos; de ritos venceyaos al solsticiu de branu ya’l d’iviernu tamién, y dende llueu nun faltaron lleendes, conxuros y’anécdotes veceyaes al tema que taba tratando.

P1050216

Dende la Lliga Celta d’Asturies esperamos que vos haya prestau tantu comu a nos y veros a toos/es na silguiente actividá que faremos el mes que vien que ya vos digo que va tar bien prestosu…

Salú a toos ya toes!

Fernán Morán.

Presidente de la Lliga Celta d’Asturies.

MITOLOXÍA ANIMAL ASTUR: LA CURUXA.

Baxu esti nome atopamos un garrapiellu de páxaros nuechirniegos del orde de los striguiformes. El cantu de toos ellos ye mal agüeru, y anuncia que va morrer alguien na quintana. Tienen tamién otros nomes: curuxa, cudombu, ñuética, niétova, vueyona (Tyto alba); miagona, gumiata (Athene noctua); gárabu, curuxu (Strix aluco); curuxón (Bubo bubo).

Esisten, amás d’otros indeterminaos, comu l’uxu (probablimenti’l curuxón rial, Bubo bubo), que canta cuandu va llover, o la carpía, en Ponga, que ye una especie de bruxa, un paxarón escuru que se posa cerca de les cases onde hai dalguién enfermu que va morrer.

14

Hai conceyos (Caravia, Xixón, Siero, Piloña) onde se fala de la guaxa comu un páxaru asemeyáu a la curuxa.

Regelio Jove y Bravo, en “Mitos y supersticiones de Asturias (1897)” diz que la guaxa ye una muyer mui esmirriada qu’entra pela pesllera les cases pa chupa-yos el sangre a los neños o a les moces con un dentón mui llargu que tien. Cuandu dalguién desaparecía del pueblu o diba consumiéndose d’enfermedá, dicíase: “Paez que lu tragó la guaxa” o “Violu la guaxa”. Aurelio del Llano, anotaba en 1919, en el libro “El libro de Caravia”, que la guaxa, como bruxa, yera inventada por eruditos, y que se trataba del nome que’y daben a la curuxa… pero nun ta tan claru.

guaxa

Por exemplu, sabemos de l’acusación, en 1480, fecha pola Real Chancillería de Valladolid contra Teresa Prieta, vecina de Xove (Xixón), pòr facer l’oficiu d’estriga, ye dicir, de bruxa, y chupar la sangre a los neños pela pesllera les puertes. Vien a cuentu alcordase qu’al vampiru fema , en Rumanía, llámenlu “strigoica”, y que les “strix”, nel mundiu clásicu, yeren unos páxaros que bebíen el sangre de los críos. Nel añu 43 enantes de la nuesa dómina, Ovidio fala d’ellos, y diz que son páxaros de pñumes blanques, cabezona y güeyos mui reguilaos, con anzuelos per uñes y un picu comu un ganchu p’abrir les arteries y poder chupar el sangre. El so nome ye vampiru o strigues, y glayen pela nuechi d’una manera que respiga la piel. Amiesta que son de la mesma familia que les arpíes, metá páxaruy metá muyer.

buho

N’otros escritos, autores como Horacio o Propercio dicen que les “strix” tienen cara de muyer. La tresformación d’una muyer bruxa en curuxa apaez tamién nos escritos d’Apuleyu, que cuenta cómu Pánfila unta’l cuerpo con ungüentos y vuélvese curuxa. Equí empieza la relación ente bruxes y curuxes, y el tracamundiu de los eruditos cola guaxa asturiana.

Fonte:

“Animales míticos de Asturies”; Alberto Alvarez Peña; Ed. VTP, 2003.

Semeyes ya illustraciones.

1ª.- Curuxa volando;Autor: Guillermo Ossa; Fonte: Fotonat.org

2ª.- La Guaxa cola curuxa ua’l curuxo. Autor: Alberto Alvarez Peña: Fonte: google.

3ª.- Curuxo na nueche. Autor/a: desconocíu/a. Fonte: google.

ANTROPOLOXÍA ASTURIANO: LA CASA.

Quiciabes el elementu que meyor espeye la cultura asturiana como xuntura d’aspeutus ecolóxicos, tecnoeconómicos, sociolóxicos ya ideolóxicos, seya la casa tradicional.

Santa María'l Puertu - Somiedu 1950

Pero falar de la casa na Asturies tradicional  ye referise nun solo al espaciu dedicáu a vivienda, sinón a la casería, una ferramienta de producción, l’unidá d’esplotación agropecuaria. L’elementu central de la casería ta constituyíu pola vivienda familiar, que s’iguará d’estremaes soluciones formales a lo llargo’l territorio asturianu acordes acordies con factores de tipu ecolóxicu (xeología, altor, orientación y topografía de los asitiamientos, factores cronolóxicos, tradición cultural y capacidá económica de los sos habitantes (factor esti caberu que va cuntar abondo nel diseñu y magnitú de les construcciones y na enxerta d’elementos d’estilu nel mediu rural).

Sonade casa pachorro 1927 cangas del narcea

Del amiestu de toes estes variables surde una bayurosa tipoloxía que va, dende l’arcaica casa redonda, onde nun mesmu espaciu conviven la xente y’el so armentíu – ún de los hábitats más antiguos d’Europa, que tien el so aniciu nes característiques viviendes de planta arrondiada de los castros de l’Edá del Fierru – y el so desencolcu, fasta les cases de corredor ente almanques, treslláu de modelos urbanos documentaos nes ciudáes y poles asturianes de los sieglos XV y XVI, o les casones d’influxu barrocu, propies de campesinos acomodaos.

diego j alvarez

Esti complexo desencolcu pue percorrese pasu ente pasu al traviés de los elementos arquitectónicos que inda se caltienen n’Asturies; pa los tipos más cenciellos afítalo Mark Gimson, arquitectu anglés que lo estudiara nel añu 1978:

Nel llugar de la Braña, averáu a Cangas del Narcea, atopé y medí una casa que ye’l meyor exemplu que viera d’una versión rectangular de la palloza (casa de planta arrondiada y teitu). El descubrimiento d’estes cases tien gran importancia pa los estudios celtes na Gran Bretaña ya Irlanda, pos constitúin un aniellu que faltaba nel desencolcu de les construcciones vernácules. Los arqueólogos na Gran Bretaña escavaron cases redondes nos “hill forts” (altos fortificaos), perasemeyaos a los castros del NO de la península Ibérica ya les citaneas de Portugal. Una de les cases-tipu característiques dientru de les llendes celtes ye la “long-house” (casa llarga). Son cases de planta baxa, nes que los animales allúguense nuna mitá y les persones na otra, esistiendo tamién polo xeneral una tenada, y cola llariega nel mediu. Sicasí, fasta angüañu nun fuéramos a amosar si esistía rellación entre les cases de los “hill forts” y les “long – houses). La versimilitú de talu desendolcu vese na esistencia del NO de la penísnsula Ibérica nun solo de castros y cases pareyes a les “long-houses”, sinón tamién de les más de les sos etapes intermedies (Mark Gimson 1983)”.

Fonte:

“Asturies memoria celta”; Varios autores; Ed. Fundación Belenos.

Semeyes:

1ª.- Santa María’l Puertu – Somiedu – Asturies, añu 1950. Autor/a: desconocíu/a. Fonte: Facebook.

2ª.- Sonade Ca Pachorro’n Cangas del Narcea – Asturies (1927). Autor: desconocíu/a. Fonte: google.

3ª.-  La Pornacal – Somiedu – Asturies. Autor: Diego J. Alvarez. Fonte: google.

 

MÚSICA FOLK ASTURIANO: LLAN DE CUBEL.

Llan de Cubel ye ún de los más veteranos (dende 1984) y el de mayor repercusión, internacional de los grupos del folk asturianu. El so nome ta sacáu del Picu Llan de Cubel ente los conceyos de Cuideiru y Pravia.

La so música ta basada nel  repertoriu tradicional asturianu (popular y ensin autor reconocíu).

El so soníu ye acústicu y apoyen les sos melodíes na gaita asturiana, el vigulín y la flauta travesera de maera, pa la percusión tiren de tambor tradicional y de bodhran mientres que l’armonía ye cosa de la guitarra acústica y del bouzouki. Tamién usen dalgún mediu llétricu pa pasaxes mui concretos de la mesma forma qu’a pesar de ser un grupu de clara vocación instrumental, tamién recueyen cantares nel so repertoriu.

El so repertoriu ye na so mayoría de temes asturianos (alboraes, marches, pasucais, saltones, muñeires, polques, entemedios de misa, tonaes, vaqueiraes, villancicos, cantares mariñanos, de llabor, de chigre, etc…). Anque tamén tienen fecho guiños a temes tradicionales d’otros países del Arcu Atlánticu.

La primer formación xuntó al nucleu carbayón d’Elías García, Fonsu Mielgo, Susi Bello y Daniel Lombas, col pixuetu de Guzmán Marqués  y Marcos Llope . D’esta primer formación aguañu siguen Elías García, Fonsu Mielgo y Marcos Llope, xunto con Xel Pereda (1995), Simon Bradley (1996) y Xuan Rodríguez (1997). Tamién tuvieron nel grupu Flavio Rodríguez y J. M. Cano.

Discografía:

Deva (1987)

Na Llende (1990)

L’otru Llau de la Mar (1992)

Llan de cubel IV (1995)

Un Tiempu Meyor (1999)

Fonte:

Wikipedia.

Vídios coligaos:

1º.- “Rigu Esva” de l’album “L’otru llau de la mar” (1992) Autor: Llan de Cubel. Fonte: Youtube.

2º.- “La casa gris” de l’album “Un tiempu meyor” (1999). Autor: Llan de Cubel. Fonte: Youtube.

3º.- “Fandango puntiau & alborada asturiana”; autor: Llan de Cubel; fonte: Youtube.