MITOLOXÍA ASTUR: LES SERENES.

Yeren conocíes na Edá Media como ‘Fadas marinhas’. Na tradición oral el so orixe ye una maldición d’una madre a una fía por desoyer los sos queferes diarios por dir nadar a la mar. La madre enraxonada va dici-y ‘Dexe Dios te faigas pexe y te fartes d’agua’.

villanueva de teberga

N’otres versiones dizse: “Serena de la mar ye una moza gayarda que per una maldición tienla Dios nel augüa”. Empero’n dellos conceyos del suroccidente asturianu’l so orixe ye daqué distintu. Dizse que les encantaes (versión occidental de la xana) si dempués de milenta años nengún valiente les desencanta, estes van montar nun arca cargá d’oru y van baxar pel ríu escontra la mar a tresformase’n Serenes, asina lo cunten nel Monesteriu Corias (Cangas).

san vicente de Serrapio

Tamién hai lleendes de serenes fluviales, la de Llanu (Cangas), el ríu La Pedralba (Illas), el Castrón de Barréu (Tinéu) o les de San Martín de Valdetuéjar (Llión).

san claudio de olivares zamora

L’etimoloxía de la palabra serena tien relación col vocablu púnicu “Sir” (cantar) ya’l semíticu “Seiren” (muyer qu’estela col so cantar). En Bual cuntábase que col so cantar distrayíen a los marineros pa faelos naufragar, asemeyau que les serenes de l’Odisea d’Ulises.

ciaño langreo

Emperu les serenes grecorromanes yeren metá muyer ya metá ave. Les Serenes asturianes al igual que munches otres europees son metá muyer y metá peixe, cuestión que pal estudiosu Claude Kappler circunscribese al ámbitu célticu, pa dempués espardir esta iconografía per toa Europa.

mitologia-sirenas

Como exemplu de la cristianización d’una antigua divinidá marina atopamos n’Irlanda a Santa Murgen (Nacida de la mar) una serena de nome Liban que foi bautizada per San Comgall en cuenta de vivir otros 300 años na tierra. Esta lleenda recoyer en “Añales del Reinu d’Irlanda” obra compilada nel sieglu XVI.

Fonte:

“Mitología asturiana”. Autor: Alberto Alvarez Peña. Ed. Picu Urriellu.

Semeyes:

1ª.- Capitel de l’ilesia de Vil.lanueva’n Teberga – Asturies. Fonte: fotoviajero.com

2ª.- Capitel de l’ilesia de Serrapio – Ayer – Asturies. Fonte: Wikipedia.

3ª.- Capitel de San Claudio de Olivares en Zamora – País Llïonés. Fonte: Arteguias.com

4ª.- Capitel de l’ilesia de Ciañu – Llangréu – Asturies. Fonte: Fotoviajero.com

5ª.- Serena nel escudu de Pendueles – Llanes – Asturies : Autor: desconocíu.

 

 

ACTUALIZACIÓN DE LA “RUINA MONTIUM” (ESBARRUMBAMIENTU DE MONTES). UN SISTEMA D’ESTRACCIÓN D’ORU DE LOS ASTURES NA EDÁ DEL FIERRU.

Nel añu 25 A.C., Roma decide empecipiar una campaña de conquista y colonización d’Asturia, nel noroeste de la Península Ibérica.

Magar l’escusa oficial de dicha intervención ye la proteición de los pueblos asitiaos al sur de los Ástures, que yeren atacaos abondes vegaes por éstos, tolos hestoriadores contemporaneos coinciden, en que les enormes fontes d’oru de la nueso rexón, foron el principal motivu de la intervención del exercito romanu.

Finada la campaña de conquista, que con distintes interrupciones enllárgase fasta l’entamu’l sieglu I d. C., Roma promueve una política d’esplotación industrial del oru, por aciu complexos y monumentales sistemes d’inxeniería hidráulica, víes de comunicación, y la consilguiente crecedera de munchos centros de población llocal.

Nel añu 77 AD, l’hestoriador Plino El Vieyu (Hestoria Ñatural 33,21), quien sirvió como “procurator” n’Hispania, describe una de les diverses técniques utilizaes nos nuesos montes pa facer más afayaices les esplotaciones mineres.

Figure 1

Por aciu la “Ruina Montium”, los mineros escavaben estenses canales dende zones de suministru ñatural d’agua, o preses artificiales. Dichos canales, convertiense’n túneles al l.legar a la llomba que quería desintegrase, y’abriendu-y’l pasu a l’agua, la fuercia hidráulico españaba grandis sectores de tierra y roca, de que’l so llaváu posterior en regueros, llográbase l’oru.

Esti sistema, apaez tamién na inxeniería defensiva de munchos de los castros ástures nel so sector más occidental. Los fosos escavaos en roca y en tierra abríense escavando a mano unes fiendes iniciales, que yeren ampliaes re-dirixiendo escontra elles regueros cercanos por aciu canales, qu’aidaben cola erosión constante de l’agua, a l’ampliación de loes defenses.

Les referencies documentales de Plinio, la monumentalidad de distintos xacimientos mineros, claramente venceyaos al períodu Ástur-romanu, según la discutible asignación académica de que tou lo monumental o complexu, correspuende ensin dulda a les influencies mediterránees, crearen fasta güei l’idega de que toa obra de minería antigua yera una obra romana.

La total falta d’escavaciones nos cientos de túneles mineros catalogaos embaxu los montes asturianos, apurrieron un soporte importante a la de defender esa hipótesis calteníu pel mundu académicu tradicional.

figure 2

Mientres l’añu 2012, l’estudiu de diversos castros ástures, que los sos materiales se adscriben namái a l’Edá del Fierro, y que les sos defenses fueron escavaes por aciu la técnica de “Ruina Montium”, déxennos poner en dulda, el venceyu tradicional a la dómina romana d’esta técnica d’inxeniería.

Los castros Ástures, dende la primer Edá del Fierro, como demuestra’l casu escaváu’n 2004 por nós na Cogollina (Fanjul 2011), disponen d’una monumental inxeniería defensiva, qu’alterna sistemes de muralles de módulos, que drenen l’agua de lluvia dende les zones habitaes, con fosos escavaos na roca de más de cincuenta metros de llargu y dellos de fondura.

Magar nesti casu espectacular, nun s’observa un sistema mineru pa la so construcción, otru xacimientu Ástur nidimente venceyáu con esclusividá a l’Edá del Fierro, el castru de Ceruñales en Noceda, sí dispón d’un modelu de canales, que redirixen l’agua escontra la zona onde se constrúin los fosos, siguiendo’l modelu de la “Ruina Montium”.

El castru apocayá estudiáu por nós de Ceruñales, asitiáu nes cercaníes de les mayores mines d’oru d’Hispania, ye un pobláu nel qu’a la so redolada, puen reparase abondosos restos d’obres hidráuliques, destinaes non solo a la creación de pequenos frentes de llavadura d’oru, ensinón tamién pa la construcción de les defenses del pobláu.

Escaváu por aciu dellos sondeos por Alvarez González (1993), los autores de l’escavación arqueolóxica, afayen los restos de diverses cerámiques a mano, asina comu parte d’una cabana. Magar nun detecten elementos materiales romanos, salvo unes cerámiques que califiquen de “indigenas”, la presencia del foso escaváu con técniques mineres, fai-yos identificar el castru col períodu romanu, siguiendo la vieya, y según nós, errónea asignación cultural.

figure 3

Na nuesa opinión, les grandes obres d’inxeniería defensiva en castros que la so actividá foi claramente datada a finales de la primer Edá del Fierro, asina comu’l nidiu venceyamientu material del castru de Ceruñales, amuesa que les técniques mineres conocíes como’l “Ruina Montium”, son utilizaes yá polos Ástures enantes de la l.legada de los romanos, magar son éstos, por aciu l’usu d’un exércitu con inxenieros profesionales, quien consiguen faceles llegar al so máximu rendimientu.

El gran númberu de castros onde s’utiliza esta técnica, magar la falta de cronoloxíes de dichos xacimientos, fainos reforzar la nueso hipótesis, teniendo’n cunta que la romanización supón un descensu nel númberu de poblaos fortificaos.

A última hora, l’arqueoloxía paez demostrar una vegada más l’avanzáu desenvolvimientu d’un pueblu de la Edá del Fierro Atlántica como’l de los Ástures, frente al asignáu “xabacismu” tradicional, defendíu primero polos hestoriadores romanos, y darréu fasta los nuesos díes, per bona parte del mundu académicu oficial.

Fonte:

Espublizáu por Alfonso Fanjul Peraza nel añu 2013 na revista británica “PAST” de la Prehistoric Society, embaxu’l títulu: “mountainUpdating the Ruina Montium (wrecking of mountains). An Iron Age gold mining system”. 

Alvarez González, Y. (1993): “Arqueología del paisaje. Modelos de ocupación y explotación de los castros del valle de Noceda. León”. Complutum, 4: 264-278.

Fanjul Peraza, A. (2011): “The valley conquest. New dates on the development of fortified settlements in the high mountain area of northern Spain”. Origini. Preistoria e protoistoria delle civiltá antiche, XXXIII. Nuova Serie, V: 303-318.

Semeyes:

1ª.- Esplotaciones mineres d’oru de dómina romana na sierra del Palu, realizaes por aciu el sistema de ruina montium.

2ª.- Vista aérea del castru de Ceruñales (Alvarez González 1993), onde s’observen los frentes mineros, de los cualos, ún d’ellos utilízase pa la construcción del foso.

3ª.- Castru Ástur de San Martín del Valledor, onde s’observen defenses construyíes por aciu canales y técniques mineres. La bayura de castros con esti tipu de defenses, y la relectura cronolóxica del castru de Ceruñales, llévennos a plantegar que los Ástures remanaben estes técniques enantes de la llegada de los romanos.