CHARRA / ESPOSICIÓN: LA PITA PINTA ASTURIANA.

Foi un braeru preste sentir a Víctor Manuel Iglesias, criador y espertu de la variedá aviar de Pita Pinta Asturiana güei na charra qu’entamamos na Lliga Celta d’Asturies.

Víctor tuvo realmente brillosu, falónos de les característiques morfolóxiques d’esta magnífica gallinácea, del so descubrimientu por un veterinariu, de como se foi recuperando la especie, yá que taba a puntu d’escastase. Tamién la comparó con otres pites de la península Ibérica (castellanes, vasques, gallegues, catalanes, andaluces, etc), y d’otres partes d’Europa. Asina mesmu amosónos les semeyances con otres pites del Arcu Atlánticu.

En fín, que les persones que tábamos na sala pudimos deprender un montón de coses y, coles mesmes visualizar “in situ” les diferencies y semeyances ente les pites que formaben parte de l’esposición que yeren de les especies: castellana, pita pinta y pedresa. Nun fai falta dicir que l’esposición de Víctor, amás d’interesante y didáctica foi prestosa y afayaíza abondu.

Dende la Lliga Celta d’Asturies queremos agradecer la presencia de les persones qu’averáronse a sentir la charra; los perinteresantes apurrimientos de Roberto Alvarez, que tuvieron bien interesantes y prestosos; a la Ca’l Conceyu d’Uviéu por cedenos l’usu la sala 5 del Hotel d’Asociaciones Santuyanu; y por supuestu a Víctor pola so collaboración y enfotu en danos a conocer una especie aviar tan de nueso comu ye la Pita Pinta Asturiana.

Fernán Morán, presidente de la Lliga Celta d’Asturies

Semeyes:

Toles semeyes d’esti post tan cedíes por Roberto Alvarez, autor de les mesmes.

Anuncios