VISITA GUIAO AL CASTRU SAN CHUÍS Y XINTA NA NUEVA ALLANDESA

El pasáu domingu, 28 d’abril, xuntámonos un puñáu de celtes y esfrutamos d’una visita’l castru de San Chuís na que’l doctor n’arqueología Alfonso Fanjul Peraza ilustrónos falándonos de los trabayos arqueolóxicos que se realizaren nel castru, la so estructura, el so periodu d’ocupamientu, les actividaes que se desenvolvíen dientro del castru… a lo último una gran cantidá d’información “in situ” mientres esfrutábamos de la visión del castru y del maraviyosu paisaxe que nos arrodiaba.

L’actividá emprincipió a esu del mediudía, fuimos en coches hasta l’empiezu d’una pista forestal que taba en bastante bon estáu y seca, y dende ellí aportemos al castru dando un prestosu y pequenu paséu d’alredor de 15 minutos.

Una vegada nel castru, dimos en la realización de la visita siguiendo la ponencia ya indicaciones del nuesu guía arqueolóxicu Alfonso Fanjul Peraza y dempués d’una hora y media o dos hores aproximádamente, baxemos de nuevu escontra los vehículos dende nos que dirixímonos al restorán La Nueva Allandesa, na localidá de La Puela, nel conceyu d’Ayande.

Nel restorán, como nun podía ser otra manera, recuperamos fuerces del paséu tastiando’l famosu Menú del Pelegrín, compuestu de pote asturianu, puding de verdures con mueyu de tomate, repollu relleno de carne desmechau y postre… ¡escusamos dicivos cómo nos emprestó y lo bien que lo pasamos!

Para acabar, estimar fondamente l’asistencia de la casi ventena de persones que participásteis de l’actividá, la collaboración inestimable del doctor n’arqueoloxía Alfonso Fanjul Peraza y a los dioses pel día soleyeru y estupendu que nos dexaron para faer l’actividá!

Tais convidaos pa la prósima!!!

Fernán Morán

Presidente de la Lliga Celta d’Asturies

Semeyes:

Anselmo Coto Argüeyes

Anuncios