XINTA AÑAL DE LA LLIGA CELTA D’ASTURIES YA HOMENAX A BERTU PEÑA Y XESÚS LÓPEZ PACIOS.

El pasáu domingu 16 d’avientu celebramos la xinta añal de la Lliga Celta d’Asturies, un eventu reserváu para socios/es y simpatizantes nel qu’aprovechamos la oportunidá para realizar un pequenu homenaxe a dos homes se gran significancia pa la nación celta d’Asturies: Bertu Peña y Xesús López Pacios.

A Bertu Peña pol so compromisu con Asturies, la nuesa cultura y la nuesa identidá, y por décades dedicáu a investigar, recoyer y espublizar tou esa conocencia sobro la nuesa etnografía. Tamos falando de más d’una trentena de llibros, cientos d’artículos y collaboraciones, innumberables charres y conferencies, etc, etc,. Un gran home al que quixímos agradece-y el so llabor y concede-y la membresía d’honor na nuesa organización amás del nuesu más fondu agradecimientu. Gracies Bertu!

A Xesús López Pacios… cofundador en 1981 de la Lliga Celta d’Asturies. Un guerreru Ástur que, xuntu con un puñáu más, trabayaron bien duru para amosar al mundu la nuesa identidá celta. Nun momentu nel que nun había los medios d’agora, llograron espublizar el cartafueyu ASTOR que se vendíase nos 5 continentes, solicitaron l’inclusión d’Asturies na International Celtic League, fixeron esposiciones, conferencies, alcuentros… Y amás, Xesús en concretu, unos trabayos escelentes sobro materies como’l matriarcáu ástur, el derechu consuetudinariu ástur, escoyeta de palabres con raigañu celta na llingua asturiana… en fín, un home trabayador, comprometíu col panceltismo asturianu y que lleva decenes d’años trabayando pola causa. Gracies Xesús, a tí, nun podemos más que nomate Presidente d’Honor de la LLiga Celta d’Asturies y estimate tol to llabor por Asturies y pola nuesa cultura ya identidá.

Amás de los dos homenaxaos, miembros de la Lliga Celta d’Asturies y simpatizantes, tuvimos el prestar que cuntar con Diego Santos, presidente de la Lliga Celta Lleonesa que quixo compartir esti día con toos nós, un actu que pon de manifiestu la voluntá d’ástures tresmontanos y cismontanos de formentar la xermandá ente les dos naciones celtes hermanes: Asturies y Llión.

Y claro, amás d’esu, falamos, reímos, charramos, canciamos, xintamos y sobro too… chumamos! Puxa la Lliga Celta d’Asturies… puxa Asturies… puxa Keltia! Ta l’añu que vien!

Fernán Morán, presidente de la Lliga Celta d’Asturies.

Anuncios