Hola collacios y collacies, un añu más celebramos la Llacuada Celta de la Lliga Celta d’Asturies, esti añu en concordancia cola entrada d’Imbolc, la primavera celta. Axuntámonos, como ye vezu nel restaurante Ca’l Xabú, un garrapieyu celtes pa esfrutar en xuntanza d’una llacuada celta asturiana y, a la mesma vegada, face-y homenax a Ignaciu Llope, ilustráu asturianu que lleva toda la vida estudiando y trabayando pola cultura asturiana y el celtismu asturianu.
L’eventu emprincipió alrodiu les 13:00h del 1 febreru cola interpretación a gaita del himnu d’Asturies a cargu del nuesu compañeru Xermán, nun fai falta dicir que dexónos a toos y a toes colos pelos como escarpies.
De siguíu, Fernán Morán, Presidente de la Lliga Celta d’Asturies, verbalizó un discursu breve pero intensu entituláu «¿Por qué caltenemos esta llucha?», nel que faló de la situación académica y social del celtismu asturianu y la necesidá de caltener el punxu y trabayar con intensidá y rigor pola nueso cultura y la nueso identidá celto-atlántica.
Fináu esti discursu inicial, pasó a la llectura d’unes pallabres nes que faló de les razones que xustificaben la decisión de otorga-y el diploma d’agradecimientu que se-y dió a Ignaciu Llope basaes, sobremanera, na so llabor social al traviés del exerciciu de la melicina y la so vocación cultural-asturianista y celtista desendolcada a lo llargo de la so vida na que dexonos productos lliterarios enraigonaos na nueso cultura más ancestral; trabayos y ensayos venceyaos al celtismu asturianu, y una actitú exemplar hacia’l movimientu interceltista astur.
De siguío, procediose a la entrega del diploma y otros obsequios a Ignaciu Llope como amuesa del nuesu agradecimientu y almiración pola so llabor.
Darréu, Ignaciu, regalonos unes pallabres a tolos asistentes al eventu que dexaron manifiesta la so intelectualidá y el so fonderu conocimientu de la nueso cultura y el nuesu celtismu. Tamién, como amuesa de la so xenerosidá, quiso facer estensible el reconocimientu de la nueso organización a tol colectivu de la Fundación Belenos.
Dempués d’esu nun vamos dar más detalles, xintamos un maravillosu menú asturianu en Ca’l Xabú atendíos/es de maraviya pol escelente personal d’esa casa y regose tou ello con sidre abundante, vinu tintu, oruxu y llicor d’arándonos; falamos, canciamos, baillamos y esfrutamos como namái nós sabemos facelo -anque d’esto nun va haber semeyes… hahahaha-
Por una banda…
Pola otra banda…
La Lliga Celta d’Asturies quier agradecer fonderamente al restaurante Ca’l Xabú, poles sos viandes y el so escelente serviciu; la presencia de Lisardo Lombardía y Astur Paredes compartiendo’l momentu con Ignaciu; a les compañeres de vida de Lisardo y Astur pol so bon facer col panderu y el baille; al mio collaciu Diego Santos de la UPL de Llión pola so presencia en representación del nuesu queríu Llión, otra cara de la vieya Asturia; a tolos compañeros y compañeros que trabayan con pasión y allegría nes actividaes y proyeutos qu’entamamos na Lliga Celta d’Asturies y, por supuestu, a tolos/es que vos averastis a esta llacuada qu’esperamos os prestara tantu como a nós.
Un abrazu a toos y toes y ata la prósima!
Fernán Morán, Presidente de la Lliga Celta d’Asturies.
Lliga Celta d'Asturies 