MITOLOXÍA ASTUR: EL NUBERU.

Gobierna les nubes, prevocando’l xarazu, la tona y los llampiazos, cabalga les temestaes. Vístese con pelleyos y cúbrese con un sombreirón prietu d’ala ancha. Les barbes mui llargues y esmendrayaes, dalgunos dicen que ye tuertu d’un güeyu. En Caliao (Casu) llámenlu Marfañao, en munchos otros conceyos ye Xuan Cabritu y en Teberga y Somiedu’l Renubreiru. Dízse que vive’n sitios mui allueñaos d’equí, los montes más altos, na ciudá de Lita, Orita, Brita, o los montes de Tudela. Tamién na ciudá del Gritu n’Exitu. Esti caberu datu ye lo que facía que’l folclorista Aurelio de Llano viere oríxenes libio-fenicios nesti personaxe, teoría bastante esllabazada. Si tuviéremos que buscar anicios en deidaes antigües, sedría más afayaizu facelu nel célticu Taranis (del que quédennos abondos topónimos, Tarañes (Ponga), Táranu (Salas), Taraña (Sieru) o Tarañosdiós (Cangues d’Onís) impresionante tautoloxía) trataríase de la mesma divinidá gala que dempués sedría asumida polos romanos como “Júpiter Tonans”. El Nuberu tamién podría tar emparentau con divinidaes xermániques comu Wotan o Daner-Thunaer, que cabalguen les ñubes y gobiernen la tona y van en trineu tirau por llobos, al igual que l’Odín escandinavu que tamién ye tuertu. En Quirós el nuberu anda poles nubes esparrau nun rastru tirau por perros y llobos y tamién y falta un güeyu. Los vieyos dioses pasaron a convertise, col cristianismu en degorrios. En Faeu (Miranda) el Nuberu ye un diablu que vien monta unes nubes cargaes de tormenta, ellí dempués de que lu esconxure’l cura dirá descargar el xarazu al picu’l Gallu Carriceu, a un llugar que llamen La Seita, y onde, dende entós, nun volvió crecer vexetación denguna.

nuberu

En Campumanes (L.Lena) el Nuberu ye mui altu, una solombra prieta grandísima ente les nubes. Pero, amás, en delles hestories, dizse que los Nuberos son bruxos que manexen les tempestaes al so antoxu. Nel Gumiu (Bual) lleíen por llibros de “maxia negra” pa encaramase nes nubes. El cura veíase obligáu a esconxuralos col misal y asperxando agua bendito y hasta tirándo-yos un zapatu o’l mesmu bonete. La referencia a bruxos que provoquen tempestaes ya apruz na Capitularia Regum Francorum del obiespu Agobardu, en Lyon (816) y nel manuscritu del sieglu XIII “Narratio Reliquis a Ilyerassolyma Ovetum usque translatis”, onde fálase d’una muyer nómada Aria, que foi esconxurada pol obiespu Gunscellus. Dempués, la tal Aria, falaba de la so vida de pagana y de cómu’n plenu agostu fizo cayer tal xarazu n’Uciéu que-yos llegó a la xente peles rodielles, mientres ella diba esparrada nes nubes. Sedrá’l mentau obiespu Agobardu el que diz qu’estos “tempestiarios” vienen d’una tierra de llueñe, nomada Magonia, que podría traducise llibremente por “País de magos”. Lo mesmu qu’el Nuberu al que se-y busquen ciudaes o países fabulosos arrodiaos de maxa y misteriu.

nuberu_by_beledra-d4mjfp3 (1)

Una de les coses que los Nuberos nun soporten ye’l retumbar de les campanes de la ilesia que dicen: “Téntere nube, ténte tú, que dios puede más que tú”. En Villanueva (Bual) decíase que vivía un Nubreiru mui feu y prietu qu’un día foi pa Sarandías nuna nube y atopose con otru que venía d’ellí escorríu porque punxérense a tocar la Capielluda (la campana de Santa María de Sarandías). En dalgunos pueblos del conceyu de Cangas del Narcea dicen qu’el Nubreiru entretiense trosquilando les cabres pa dempués meter un pelu d’elles en ca piedra del xarazu. P’afuxentalu facía falta que d’alquién volviera un carru del país del revés, porque la pértiga y la exa facíen una cruz. Tamién solíen sacar en toda Asturies la pala d’arroxar el fornu y “cruzar” los aires con ella, colóquenla nel occidente xunto col robadiel.lu en forma cruz cruzada (cruz de San Andrés) a la puerta casa. Tamién se pondrá la vela María o Tinieblaria del Xueves Santu, o ramines de lloréu benditu mientres se rezaba a Santa Bárbora: “Santa Bárbora bendita que nel cielu tas escrita con papel y agua bendita, guarda pan, guarda vinu, guarda xente del caminu”. En Combu del Coutu (Cangas del Narcea) decíase cuando tonaba:

“Tona, tona reburdiona / más arriba Cristo sona / dios ampare’l pan ya’l vinu / ya las casas del peligru / Al.la vayas descargar / a las penas de la mar / aou nun oigas ai gal.lu pintu cantar / nin las campanas tocar / nin los bueis reburdiar.“

Esti responsoriu ye interesantísimu porque caltién dellos trocinos qu’aprucen nun esconxuru atopáu en Carrio (Villayón) escritu nuna llabanina de pizarra, datau al rodiu’l sieglu VIII, onde mándase marchar a la tormenta “onde nun se sienten gallu nin gallina cacarexar, nin campanes tocar nin bueis llabrar”.

bertu peña

Tamién yera vezu poner tixories, fachos o cuchiellos col corte mirando p’arriba pa “cortar” la nube de tormenta. Y por supuestu l’aición del cura párrocu, mesmamente hubo un mui afamau en conxurar tormentes en Vil.lanuova (Teberga) que morrió en 1856, solía arrodiase de neños pa facer l’esconxuru, porque yeren símbolo de pureza escontra la tona que trayía’l Renubreiru, pero cuéntase, qu’un día, nun-y salió bien l’esconxuru y tuvo que tira-y un zapatu a la nube, el Renubreiru que venía montau n’ella garrolu nel aire y dempués foi descargar al Picu Tromeu.

Hai abondos cuentos nos qu’un pastor abelluga na so cabaña a un Nuberu que cayó con una chispa y da-y de xintar, al despedise d’ellí el Nuberu diz-y: “Si vas a la ciudá de Brita, pregunta por Xuan Cabrita”. Pasal’l tiempu y el pastor tendrá que colar llueñe de casa, nunes versiones a la guerra colos moros y n’otres más modernizaes a facer les Amériques, pol viaxe naugraga y va dar a países estraños, andando de mendigu atopará la ciudá de Brita y ellí abellugáralu’l Nuberu, que dempués llevaralu poles nubes hasta’l so pueblu, n’Asturies, pa impedir que la so muyer se case con otru, porque pensaren que morriera nel naufraxu. El Nuberu pondrá-y comu condición que nun nome nin a dios nin a los santos, cosa que’l pastor escaecerá al acolumbrar la prosimidá del casoriu.

odin

Anque’l Nuberu entornarase tirando al pastor, al oír nomar a dios esti salvarase al quedar enganchau nel árbore, texu o carbayu, qu’hai al pía l’ilesia. Poniendo fín asina a los nueos esponsales.

Ente les munches versiones que podemos atopar d’esta hestoria podemos citar dalgunes de Taxa (Teberga), La Mayada Merguynes (El Sueve), Artidiellu (LLigüeria-Piloña) y Sotres (Cabrales).

Fonte:

“Gúia de la Mitoloxía asturiana”; Alberto Alvarez Peña; CH Editorial, 2006.

Illustraciones:

1ª.- Nuberu. Autor/a: desconocíu/a. Fonte: google.

2ª.- Nuberu. Autor/a: Beledra.

3ª.- Nuberu. Autor: Alberto Alvarez Peña.

4ª.- Nuberu. Autor/a: desconocíu/a. Fonte: google.

Anuncios

Responder

Introduce tus datos o haz clic en un icono para iniciar sesión:

Logo de WordPress.com

Estás comentando usando tu cuenta de WordPress.com. Cerrar sesión / Cambiar )

Imagen de Twitter

Estás comentando usando tu cuenta de Twitter. Cerrar sesión / Cambiar )

Foto de Facebook

Estás comentando usando tu cuenta de Facebook. Cerrar sesión / Cambiar )

Google+ photo

Estás comentando usando tu cuenta de Google+. Cerrar sesión / Cambiar )

Conectando a %s