ÁSTURES NES FONTES CLÁSIQUES.

N’esti artículu vamos facer un pequenu asoleyamientu de fragmentos d’obres de les fontes clásiques nes que descríbese la nación o’l pueblu ástur. Los fragmentos escoyíos nun tan puestos n’orden cronolóxicu, tan asoleyáos por autor y obra. Esperamos que vos preste tantu comu prestonos a nosotros/es.

«Toos los montañeses son sobrios, beben augua, durmen na tierra y dexen los sos pelos llargos y sueltos según la costume de les muyeres, anque cuando lluchen cinxen la so frente con una banda. Comen principalmente carne de cabrón; a Ares sacrifiquen cabronos, y tamién cautivos y caballos; suelen facer hecatombes de ca especie de víctima, a l’usu griegu… Realicen competiciones de tipu ximnásticu, militares y de carreres de caballos, con puxilatos, carreres y combates tantu de guerrilles comu’n formación . Los montañeses alimentanse con bellotes dos partes del añu, dexándoles ensugar ya esmagayándoles; depués mólense y faen pan con elles pa caltenelo enforma tiempu. Tamién beben cerveza «zythos». El vinu, sicasí, ye escasu, y cuando lu amalguen, peracabanlu al momentu’n folixes coles sos families. En llugar d’aceite usen mantequilla. Comen sentaos en bancos construyíos alredor de les parés y guardándose el sitiu acordiu cola fonra y la posición social. La comida sirvese’n círculu, de mane’n mane y metantu beben bailen al son de la flauta y trompeta’n corru y tamién saltando y poniéndose en cuclilles. En Bastetania, les muyeres dancien entemecíes colos homes coyíes de les manes. Toos visten polo xeneral de prietu con túniques nes que tamién échense enriba cames de paya. Usen vasos de maera como los keltoi. Les muyeres lleven enagües y vistíos bordaos de flores. En llugar de moneda, los que viven nos requexos más estremaos valense del trueque de mercancíes o dan llámines de plata cortáu. Espeñen a los condergaos a la pena capital ya los parricíes los lapidan fora de les fronteres o ciudaes. Cásense como los griegos. A los enfermos, tal como facíen los exipcios n’antigüedá, sáquenlos a los caminos pa que soliciten conseyu sobre la so enfermedá a daquién que la sufriera. Utilizaben barcos de cueru ta la dómina de Brutu, güei les embarcaciones talláes d’un tueru d’árbol son rares. Les sos piedres de sal son acolorataes, empero blanca ye’l sal una vegada molíu. Asina ye la vida de los montañeses, como dixi; refiérome a los que tán asitiaos nel llau septentrional de la Iberia, los galaicos, astoures y cántabros ta los vasconos ya’l Pirinéu, yá que ye asemeyáu’l xéneru de vida de toos ellos.»

Estrabón, Geographica III,3,7,8.

”Hacia la fastera d’oriente los kallaikoi llimiten colos Ástoures y colos íberos y los demás [carpetanos, vetones y vacceos] con los keltíbres”

Estrabón, Geographica III, 4,12.

«De siguío d’ellos (los cántabros) tópense los ventidós pueblos de los ástures, estremaos n’ástures augustanos y ástures transmontanos, con Asturica, una ciudá magnífica: ente ellos tán los gigurri, los pésicos, los lancienses y los zoelas».

Plinio el Viejo, Hestoria Ñatural III,28.

«N’occidente, casi toa Hispania taba pacificada esceutu la que baña l’Océanu Citerior y toca a los montes de l’estremidá’l Pirinéu. Equí ximelgábense dos pueblos mui fuertes entá non sometíos, los cántabros y los ástures.»

Lucius Annaeus Florus,  Epitomae, II, 33, 46.

Los ástures por esti tiempu, baxaron con un gran exércitu de los sos ñevaos montes. Y nun yera a palpu qu’aquellos bárbaros entamaben l’ataque sinón que, poniendo’l so campamentu xuntu al rígu Astura, dividiendo l’exércitu’n tres columnes, preparabense p’atacar a un mesmu tiempu los trés campamentos romanos. Ya hebiera una llucha cruenta y dudosa (…) de nun ser pola traición de los brigecinos qu’avisaron a Carisio y ésti actuó col so exércitu (…) La poderosa ciudá de Lancia acoyó’l res de l’exércitu’n derrota y lluchóse nella tan encarnizádamente que, cuando tomada la ciudá, los soldaos reclamaben que se-y pegara fuéu, a dures penes pudu consiguir el xeneral que se perdonase pa que, quedando’n pie, fuera meyor monumentu pa la victoria romana que fogarada.

Floro, Epitome, bellorum omnium annorum DCC, II, 33, 54-59.

«Equí hai un pueblu de gran fuercia, d’ánimu llevantáu, d’eficáz habilidá, apoderando a toos la pasión pol comerciu; con barques de pieles cosíes derruempen valerosamente el turbiu mar y l’abilsu de l’Océanu llenu de monstruos; pos ellos nun supieron construyir les sos naves con maera de pinu nin de xardón, nin tampoco col abetu curvaben les barques como ye costume sinón que, cosa digna d’almiración, siempres construyíen les sos naves con pieles xuníes, percorriendo con frecuencia sobre’l cueru’l vastu mar.»

Avieno, Ora Marítima.

«Nel añu 726 de la fundación de Roma, siendo cónsules l’emperador Augusto per sesta vegada y Marco Agripo per segunda vegada, entendiendo qu’a poca cosa amenorgábase lo fecho n’Hispania mientres doscientos años si dexábase que los cántabros y los ástures, los dos pueblos más fuertes de Hispania, portáranse al so albedríu, abrió les puertes del templu de Jano y salió en persona con un exércitu escontra Hispania.»

Orosio.

«Los ástures, puestu’l so campamentu xuntu al ríu Ástura, hebieran vencíu a los romanos con grandes proyeutos y fuercies de nun ser éstos preveníos y puestos sobre avisu. Intentando destruyir por sorpresa a los trés legados, coles sos trés lexones ya divididos en tres campamentos, con trés frentes d’exércitu, foron afayaos per una traición. Dempués, Carisio, atacándolos, venciolos nuna batalla, produciéndose bastantes muertes nel llau romanu. Parte d’ellos (los ástures), refugándose na llucha, foron abellugase a Lancia y, como los soldaos prepararen incendiar la ciudá yá abarganada cimeramente, el xeneral Carisio pidió a los suyos qu’arrenunciaren d’incendiala ya esixó a los bárbaros una entrega voluntaria. Con gran interés intentaba dexar la ciudá íntegra y incólume como testigu de la victoria.»

Orosio, Hist., VI, 21, 9-10

«Conduzlu (l’ástur) Cydno, endurecíu pola caza nel cordal pirenaicu, aumentando’l combate cola so xabalina gala o’l so dardu moru»

Punica, III, 338-339.

«Callaecia sonrió coles sos flores, y’el fermosu Duria coles sos veres llenes de roses. Los vellones de les oveyes totalmente tiñíos de púrpura. L’océanu cántabru refundió a la sablera les sos perlles; nin el maciu ástur déxase perder poles galeríes de les mines, que devuelven a esgaya l’oru ufiertáu pal sagráu natalicio; y nos covarones de los Pyrineos les ninfes fluviales lleeron presaxos nes piedres de fueu.»

Caludius Claudianus, Larus Serenae, 72-82.

Fontes:

Citáes al final de ca fragmentu.

Torna a l’asturianu:

Fernán Morán

Illustraciones:

1ª.- Mapa de los galaicos, ástures y cántabros na dómina romana. Autor/a: desconocíu/a.

2ª.- Guerreros ástures; Autor: Albert N.

3ª.- Batalla ente ástures y romanos. Autor/a: Angus McBride.